ديوان الشاعر الامير بدر بن عبدالمحسن

السلام عليـــــــــــكم ,,

[ندعوك للتسجيل في المنتدى أو التعريف بنفسك لمعاينة هذه الصورة]

الرسام والشاعر الامير بدر بن عبدالمحسن بن عبدالعزيز ,,
مدرسة شعرية ظخمه ذات أسلوب خاص ,, تخرج منها رواد من الشعراء .

البدر شاعر لا ينافس إلا نفسه ,, شاعر يكتب الشعر ليس فقط للقراءة إنما أيضا للتأمل .

من منا لم يرتوي من أشعار مهندس الكلمة البدر
شاعر تحدث في قصائدة عن الحياة والزمن والأمل والحب ,,
عند تأملك لأشعار البدر تجد انها اقتبست من حياتك تجد نفسك فيها
تذهب بك إلى عالم آخر لم تعيش فيه من قبل ,,

ولد شاعرنا صاحب السمو الملكي الأمير بدر بن عبدالمحسن بن عبدالعزيز ال سعود بمدينة الرياض بحي الفوطة في الثاني من ابريل عام 1949 م , وهو الابن الثاني من الأخوة بعد سمو الأمير سعود بن عبدالمحسن ...

والد البدر .. عبدالمحسن بن عبدالعزيز :
( كان ولد البدر , عبدالمحسن بن عبدالعزيز حريص كل الحرص على نشأت أولاده وتعليمهم
كان محب للعلم والأدب وكما انه شاعر مبدع , وكان مجلسة يظم وملئ بالعلماء والأدباء و كبار المفكرين في ذالك الوقت ,, وأثر ذالك على البدر بعد الله في حبه للشعر والأدب ....

تولى والد البدر أمارة المدينة المنورة في ربيع الثاني عام 1385ه , وكان له الأثر واضح في التوسع والتقدم العمراني , ومعروف بلين الجانب لأهل المدينة على لقاءهم ومجالستهم ,, وطوال مدته كان حريصا على متابعة الأمور في موقعها .....

وفي عام 1402ه داهمه المرض وأشتد عليه ونقل إلى مستشفى الملك خالد ب الرياض , حيث صارع المرض لمدة سنتين ووافاه الأجل عام 1405ه - رحمة الله –

وقد أرثا فيه البدر بقصيده غزوك يا شيخ انكف ,,
ووالدة البدر هي : الأميرة وضحى الحمود الرشيد – رحمها الله - )

درس البدر المرحلة الابتدائية بين الممكلة ومصر , والمتوسطة في مصر بمدرسة الملكة فيكتوريا بالإسكندرية ,, ومرحلته الثانوية في الممكلة وكما درس أيضا في لندن وأمريكا
واستفاد من وجوده في بعض الدول من مقابلة بعض اكبر المفكرين والأدباء , وفي مطلع السبعينات أصبح أبو خالد رئيس للجمعية السعودية للثقافة الفنون .

نبذة عن حياة البدر بلسان البدر :

فوضى من ذكريات الطفولة ...
ليست بداية لسيرة ولا نواح على ماضي ، وإنما هي رغبة دفينة في أن أبوح برجعيتي .. وبأنني إنسان قديم .
(الفوطة ) .. أبنية طينية .. مشبع طينها من الخارج بالتبن .. وداخلها مطلي (بالجص) الأبيض .. أتذكرها جيدا إننا كنا نقضم هذا الكلاء بأسناننا ونحن أطفال .
ولدت هناك .. في الفوطة... وفي الدور العلوي
تقول أمي رحمها الله ... أن العديد من الأمهات فارقن الحياة أثناء الوضع في السنة التي ولدت فيها ... وأنها كانت قلقة .. لكن ولادتي كانت يسيرة
وعيت على أشياء كنت اعتقد انني وعيت عليها .. ولكن التواريخ تثبت استحالة ذلك .
اعتقدت أنني أذكر جيدا الملك عبدالعزيز وقد توفي رحمه الله وعمري أربع سنوات .. ولكن يبدو أنني كنت اتخيل هذا الرجل الكبير بسبب وجوده بيننا بعد وفاته .
ووعيت على نفسي .. وأنا طفل يتعثر في كلامه .. وعلى ملامحه شيء من البلادة والخجل .
كان أبو سعد يشتري ما يلزم البيت من مواد غذائية .. وصويلحة تطهو طعامنا ، وبجانب القرب الضخمة التي يوضع فيها الماء ليبرد ، كانت سلامة تغسل شعري بالسدر وتدهن وجهي بالفازلين لتخفف من الشقوق الصغيرة التي يتركها البرد والجفاف على جلدي .
ومازلت أتحسس أثر كي عتيق في عنقي من الخلف ، لا أذكر حادثة الكي ولا سببها ، كان عمري سنة أو أقل .. ويبدو أنني كنت مريضا ليضعو ذلك المعدن الملتهب على لحمي .
في ربيع معشب ها جمتنا آلاف الأسراب من الحشرات ، لم يكن الأمر عاديا .. بل كان سريعا ، وما زلت اتخيل الساحة الواسعة داخل منزلنا وقد تحولت إلى بساط أسود من الحشرات .
كانوا يحشون فتحات الأبواب السفلية بالخيش كي لا تلج أمواج الحشرات داخل الغرف ..
كنا في سلام
مع الظلام والشمس الحارقة والجن والغبار
وكنا قد بدأنا
نكتشف البنسلين كمضاد حيوي وحيد يشفى كل شيء
وكنا نموت
من أمراض تعد على الأصابع

كانت القصائد قد أخذت تغفل الغزل والجمل وتتحدث عن العربة وستائرها المخملية التي خلفها النواعس السود
وكانت كل قصيدة تعرف في من قيلت دون أن يغصب أحد
وكم تمنيت أن أكبر وأحب وأكتب قصيدة جميلة في الحبيبة .
كبرت وكتبت قصائد كثيرة
ومازلت اصر أن قصائدي لم تكتب لأحد !
كنت أسمع الكبار يناقشون أشياء كثيرة ، ويتطرقون للسياسة ، ولا يخفون حماسهم لكل حركة تحررية تحدث في العالم العربي وفرحهم بها .
كنا نحس أن كل من قال : أنا عربي ، هو منا ، إلى أن صدمنا أن هناك عرب .. وعرب !

مازلت اتذكر حماسي منقطع النظير عندما حدث العدوان الثلاثي على مصر بعد تأميم قناة السويس ، وكيف كنت أسمع الأخبار والأناشيد الحماسية من المذياع الذي في غرفة صالح العنبر .. ثم أذهب لأقص كل ما سمعته على العجائز أو أمهاتي اللواتي يرافقن والدتي رحمها الله وهن يجلسن في ظلال البيت في الصباح ، وكان ولدي عادة غير جيدة حين ينشغلن عن حديثي في أمر آخر ، وهي إنني اضع إصبعي على ذقن من تواليني منهن وأجذب وجهها ناحيتي كي أكمل موضوعي الذي لا ينتهي ، هذه مرحلة ما بعد البلادة والتعثر في الكلام .
وأنا في الفوطه وعيت على كوني (ابن سعود )
ولاحظت أن الأطفال في الشارع لم يضعوا ذلك في حسبانهم كان أسلوبهم الفظ يشملني ونحن نلعب ربما تكون أول مره اعرف فيها معنى أن تكون ( ابن سعود).. ذهبت في العيد للسلام على الشيوخ وأعطيت جنيهين من الذهب وضعتهما في جيب ثوبي العلوي ... وحين خرجت استقبلني مرافقنا ( ناصر) وقال ( الحذيه ) وهي تعني انه يطلب مني أن أعطيه الجنيهين ، أو أحدهما على الأقل واشرت إلى جيبي العلوي فاخذ ( ناصر ) عيديتي ... وقد أدركت بعد تلك الحادثة أن من حقي أن احصل على أشياء مادية اكثر بكثير من أي طفل عادي ... ولكن لم يكن لي الحق في أن احتفظ بها ...
الشيخة ( بكسر الشين ) سيف ومنسف ... لا ادري إن كان هذا متل عند أهل نجد أو شرط ... ولكن الأكيد آن المشهورين من الرجال في الجزيرة العربية كانوا إما كرماء أو شجعان ...
كان من حقي وأنا طفل أن أتخيل أنني الإمام تركي بن عبدالله ... أو عبيد العلي الرشيد ... وحين أضع رأسي على الوسادة احمل سيفي ( الأجرب ) وافتح المدن ... واحرر القرى ... أو أن امتطي صهوة ( كروش ) واخوض المعارك وأنا أشدو بأجمل ( حداء ) في الدنيا ... كان بالإمكان أن يستمر ذلك الحلم لولا تدخل ... هتلر ... ومونت جمري ... وماك أرثر ... ومعرفتي المفاجئة ( بالايس كريم ) واكسفورد ستريت ...
رومانسيتي بدأت بعد أن تخطيت الثانية عشرة من عمري ... أما قبلها فلم يكن لي أي علاقة بالرومانسية ... كنت طفلا قاسيا ودمويا في بعض الأحيان اذكر إننا كنا نربي ( الحمام ) أو بالأصح أخواتي يربون الحمام وأنا أحاول أن اشوي بعضها حيا .. وفي العاشرة من عمري امتلكت بندقية وكان هذا أمر مؤسف لكل أنواع الطيور و الحيوانات إنما بعد الثانية عشرة تغيرت الأشياء وتحولت إلى فتى حالم وعاشق يمتلك شفافية كبيرة ...
يخيل لي أنني ولدت في مرحلة انتقالية وتغيرت الدنيا بعد ولادتي بسرعة رهيبة ( ليس لولادتي بالطبع دخل في هذا ) وان كنت ولدت في بيت من الطين ففي التاسعة من عمري كنت ادرس في مدينة الإسكندرية في مصر .. وفي الثامنة عشرة من عمري كنت في فرانسيسكو في أمريكا ..
في السابعة عشرة من عمري كتبت هذا الشعر :

احد هوايات البدر منذ نعومة اضافرة الرسم وقال عن نفسه أنا أرسم قبل أن أكون شاعرا و أرسم منذ الصغر , ورسمي يشبه قصائدي و الظاهر أني لا أجيد غير الشعر ولو ما كتبت الشعر لأصبحت رساما ...
ومن هواياته بعد القنص وصيد الحباري ,, وسناويا يقوم البدر برحلة صيد في احد مناطق المملكة ......

أهم أعمال البدر – وأول أمسياته :

من أهم أعمال مهندس الكلمة الأمير بدر بن عبدالمحسن أوبريت فارس التوحيد لمهرجان الجنادرية 14 السنوي حيث حصل الاوبريت على جائزة مهرجان القاهرة للإذاعة والتلفزيون ,, وابريت الجنادرية أل 7 عام 1412ه بأسم وقفة حق ,, وايضا أبريت ذهب الملوك بمناسبة مرور عشرين عام على تولي الملك فهد حفظة الله مقاليد الحكم ,, ويتكون الاوبريت من ثلاث لوح ... ومطلعها :

جيت .. من حر وبراد..
جيت من جوع وظمى ..
جيت من فتح وجهاد ..
جيت من ازكى دمى ..
وعاظني رب العباد ..
عاظني خير ونما ..
واجتمع سيف وحصا ..
انما كيف اقول انك بلاد ..
وانت يا ارضي سما ..
عشرين عام للفهد ..
عشرين مجد للوطن ..
كف بنت هذي البلد ..
وكف ابعدت عنها المحن ..
عشرين عام كلها ..
إصرار وأعمار وعمل ..
المملكة في ظلها ..
يضرب بها أجمل مثل ..

كانت أول أمسيات مهندس الكلمة التي قام بها في مدينة جدة بنادي الاتحاد , وبعد ذلك تتابعت الأمسيات لسموه في البحرين عام 1988م – ودولة الكويت عام 1987م امسية نادي الفتاة وكانت عريفة الأمسية منى طالب , وامسية ما بعد التحرير عام 1992م وألقى بها العديد من القصائد الوطنية والعاطفية ....

شملت مدرسة البدر العديد من الجوانب الشعرية من اوبريتات وقصائد وطنية ومرثيات .. طبعا ومغناه بعد .

ومن أهم وطنيات البدر : قصيدة الله أحد ..

ومن اهم مرثيات البدر : قصيدة صار الحكي كنه سكوت في الملك خالد طيب الله ثراه .. وقصيدة مشعل الدين في سماحة الشيخ عبدالعزيز بن باز – رحمة الله

ما ينقش العصفور في تمرة العذق ...

هذا هو الديوان الأول لسمو الأمير بدر و الطبعة الأولى صدرت في عام 1409 ه الموافق 1989 م ، و يحتوي على 159 صفحة من الورق الفاخر ، ولقد كتب مقدمته الدكتور فهد العرابي الحارثي ، و يحتوي على مجموعة من القصائد النبطية و العامودية و الحرة، كما انه يحتوي على العديد من اللوحات التي رسمها البدر ..

رسالة من بدوي ...
هذا الديوان الثاني لسمو الأمير بدر و الطبعة الأولى صدرت في عام 1410 ه الموافق 1990 م ، ويحتوي على 101 صفحة من القصائد النبطية فقط ، و قد اهداه سموالأمير بدر الى والده الأمير عبد المحسن بن عبد العزيز- رحمه الله - و كتبت قصائد هذا الديوان بين عامي 1388 و 1410 ه و تصميم الغلاف و خلفية القصائد بريشة الأمير بدر بن عبد المحسن ..

لوحة ربما قصيدة ...
هذا الديوان الثالث لسمو الأمير بدر بن عبد المحسن وهو ديوان يحتوي على العديد من القصائد الجميلة و التي كتبت بخط يده وزينتها لوحات رسمها البدر بريشته، يحتوي على 72 صفحة من النوع الفاخر ما بين قصيدة و لوحة، طبع في عام 1416 ه و خصص ريعه لصالح الأعمال الخيرية ..

قصائده التي لم تكتمل :

اضحكي ما عليك من الحكي ..
إنتي أجمل من وطى فوق الثرى ..
وإنتي أجمل من نظر عين تشوف ..
يا ترى وش سبب حزنك وخوفك ..
إضحكي ..

كنا ما بين الحكي .. والسكوت ..
اظهر اشواك الخصام من قلبي واشفاهي
ناظرتني بطرفها الساهي وقالت :
لو تفارقني اموت ..
وافترقنا .. لا لقا .. لا رسايل .. ولا صوت ..
وكنت أسال دايم أسأل
يا ترى وش صار فيها !؟
قالوا ( تزقح ) ماعليها .. صارت أجمل ..
ابتسمت وقلت هذا اللي ابي ..
بس ..
كيف أنا صدقت يوم قالت بموت
الصحيح .. إني غبي

نستاهل الحب ..
ونستكثر العطا ..
ماهو صحيح .. ولا عدل ..
لا تزعلي ..
هذا العتاب المر لي ..
إنتي الصواب وانا الخطا ..

الخوف ظلما .. والقلوب أطفال
والشك سيف .. يقطع الآمال
والهوى ملح الليالي .. وأجمل الأقدار
عنه لا تسأل حبيبي .. وفيه لا تحتار
العمر واحد .. والليالي قصار ..

(( الليل ))

الليل 00
ما هو الظلام وبس 00
ولا القمر 00 ولا النجوم 00
الليل هو هذا البحر 00
يظهر من شطوطه
لاناموا الناس 00
وتثاوبُ الحراس 00
الليل 00
ما هو الظلام وبس 00
انا أحس 00 أحس 00
ان البحر افلاك 00
والليل بحر 00
وانت 00 وانا 00
يا صاحبي اسماك 00

*****************************

((الفجر البعيد ))

نامت عيونك
وصحى الليل مظنونك أغاني
قصّت جناح الثواني غيبتك
وصارت الساعة أماني

وآهـ ..آهـ
أنا حروفي في غيابك
لا هي حكي ولا هي قصيد
أكتب الظلما وأعيد
وإنت يالفجر البعيد .. نامت عيونك

إسهر معي ليلة
حاول تحس بلوعتي ليلة
عد النجوم وش كثرها.. ياللي بقلبي كثرها
نام .. القمر فـ وسادتك نام
ليتك تغير عادتك
خل القمر ليله.. يسهر معي ليله

أنا حروفي في غيابك
لا هي حكي ولا هي قصيد
أكتب الظلما وأعيد
وإنت يالفجر البعيد.. نامت عيونك

يا ساحر البسمه .. أساهرك نجمه
وابسمعك كلمه .. كلمه و لو كلمه
قم نادني .. يالله عسى تحتاجني
وإن مر ليلي ما سألت

وإن زاد ظلمك ما عدلت

آهـ.. آهـ
أنا حروفي في غيابك
لا هي حكي ولا هي قصيد
أكتب الظلما وأعيد
وإنت ياالفجر البعيد.. نامت عيونك

***************************************

(( الضي النحيل))

دايم يذكرني النخيل .. غير الطفولة والرياض ..
وصوت السواقي والهديل .. مواجع الضي النحيل ..
على وجنتك ..
كان الظلام .. والله كثير ..
وما ادري وش اللي وهقه ..
واختار خدك فـ الأخير .. وشعاع خدك شققه
دايم يذكرني النخيل .. غير الطفولة والرياض ..
وصوت السواقي والهديل .. مواجع الضي النحيل ..
على وجنتك ..
نجدية الضي والعتم .. ما بين راسك والقدم ..
لي مجد .. لي مي .. ورطب .. وسنابل الياس والغضب ..
ولي مواعيد النخيل .. اللي مضت ..
وحكاية الضي النحيل مع وجنتك ..

(( العشره الحلوه ))

العشره الحلوه .. على الراس والعين ..
أحلى الليالي .. اللي مضت .. لكن مضت ..
ويش رايك في هالحين ..
دايم .. تذكرني .. اللي فات ..
كل الحياة ماضي بعيد ..
باكر تراه .. يومٍ جديد ..
أحلى الليالي .. اللي مضت .. لكن مضت ..
ويش رايك في هالحين ..
بالله .. لا تخلي الوفا .. يصبح صبر ..
لا تختصر .. كل العمر ..
وتعيش امل .. عطني عمر ..
أحلى الليالي .. اللي مضت .. لكن مضت ..
ويش رايك في هالحين ..
___________________________
(( العشق ))

العشق .. هو خال .. وزمام ..
والا العيون اللي .. محاجرها ظلام ..
وقبل السلام .. وبعد السلام ..
يابنت أنا أحبك .. والسلام ..
واناظرك وانتي بشعرك تلعبي .. باصابعك كل الحديث اللي أبي
ما تعبت ليلي أناظرك .. ومااظنك إنتي بتتعبي
با بنت أنا أحبك .. والسلام ..
_____________________________

((العمر أحبك ))

لليل احبك مابقى في السما نور
والى ضواني الليل .. للصبح أحبك
واللحظة اللي كلها عند وغرور
أشوف قبري بين عينك .. وقلبك
في صدري سراجٍٍ حزينٍٍ .. ومكسور
رغم المطر والريح .. شلته في دربك
والله مابه غير لوعاتي قصور
وخوفي عليك الله ربي وربك
ما بي جهد ابني على صمتك جسور
لا حيرتني أسباب سلمك وحربك
العمر أحبك .. مابقى فيني شعور
والى جفاني العمر .. وشلون أحبك
_______________________
(( العين مشتاقه ))

يا عاذلي .. ما تشوف العين مشتاقة
لولا الحيا جاوبتك بدمعها الصافي
عطني جلد .. كان تنخاني على فراقه
ودي الي من تركته ما أشبح خلافي
لاح الجبين .. وجذبني نوض براقه
حيثه ربيعي .. وورد الخد مصيافي
والغصن لولا المطر ما أخضرت أوراقه
يا كيف عشب الوسم يترك وينعافي

((العشق والعتب ))

السهر وقدةٍ تصلى الجروح
والهوى ما بكت عين الجريح
في الجمر دلةٍ صفرا تفوح
وأنا قلبي على الشكوى شحيح
اقشر العشق عشقٍ ما يبوح
لين يفنا عتب أو يستريح
اقضب الليل تكفى لايروح
دام لي با الصدر عرقٍ يصيح
باكر وادع وفراق ونزوح
تطلع الشمس ونجومي تطيح

________________________

((الصاحب))

يا صاحبي .. والليالي سود
يا صاحبي .. والزمن صافي
اللي إلى احتجت له موجود
واللي إلى من وعد يافي
ما هو على المرجلة محدود
تقول مكتوف بكتافي
ما جور ياللي رقيت إسنود
عرض الجبل .. وانيٍ حافي
يوم الردى مسكنه فـ .. لحود
مسكنك في راس مشرافي
والله لوفي التحرص زود
كان العمر ما نقص .. وافي
وليت الرخا لا اجتمع والجود
تقاسمه شهم .. وسنافي

_____________________

(( الطير ))

واطيري اللي زودوا فيه الأثمان
اشعل ظهر والصدر يجهر شعاعه
لو له شبيه في الملى هو غزالان
راجي عل زينه يزود بشـجاعــه
خذته ولاني يا هل الطير ندمان
من عادتي ما نيب اسوم البضاعه

الى ركز في مجلسي طير حوران
وتجمعوا عندي كثير الجماعه

وشلته على كفي كثير الغثا هان
عندي غدى للهم مثل المناعه

لا صرت فيما تطلب النفس بلشان
اترك طمان القاع وارقا برفاعه

وباكر تصاريفه على عالي الشان
من يضمن الدنيا ولو ربع ساعه

((العطش ))

آه ..يا العطش
جفت اشفاهي
وصوتي الواهي ارتعش
لو حبيبي ما .. ما سقاني الما
لو شربت أظما لحبيبي .. وللعطش

يا سموم القيظ ..جفت عروقي
تحتي الرمضا..واللهب فوقي
والعطش شوقي .. وشوقي للعطش
اسقني عيونكحبيبي .. أو أموت
ما ابي رمشك نعش

يا وسامي الحب ..امطري في القلب
الزهر والعشب ..قلبي يا مطر
الظما .. والجوع .. بعدك .. والدهر
لو حبيبي ما .. ما سقاني الما
لو شربت أظما لحبيبي .. وللعطش

_________________________

((الظما عشق ))

كل ما حث الخطى .. ينبت
الطلح في عيوني
تبني الرمال رمال
كل ما حث الخطى .. يولد
من رحم السراب جبال
أثر الظما عشق
وردت يا بير السما
الشمس دلوي والشعاع حبال
أثر الظما عشق
يا ربعي الخالي
وأثر الأماني جمال
ترعى عشب بالي
والشمس ترس نحاس
وأثر الشعاع نصال
وراعي الهوى خيال
يفكها من الياس
واحث الخطى .. ينبت
الطلح في عيوني
تبني الرمال رمال
يكبر الطلح في عيوني
ويغيب ..
يسيل من تحت القدم
رغم الجفاف .. شعيب
اقطع تجاعيد السهال
بسيف الظلال ..
ويشرق سواد بيوتكم
في ( مرو ) التلال
وغيم الخريف
البرق له وميض .. ورفيف
يشرب الطلح في عيوني
وتسقي الرمال رمال

______________________

(( السراب ))

قال السراب وقلت ظامي لسـرابه قال الهلاك وقلت لعيون الاحباب

يا لايمي في حب متـرف شـبابه الموت حق ولاتبـرق بالاسباب

كانه ذبحني صـاحبي من عـذابه ماابي لدمي يا هل اللـوم طلاب

الـجادل اللي فيه زيـن ومهابه يفز له قلبٍ .. وتخضع له أرقاب

في حجر عينة لي غديـر وسحابه وفي وسط قلبي له تناهيت وعتاب

إن قلت أحبه يكفي القلب مـابه وان قلت أنا مابيه ..باصير كذاب

((الرسايل ))

وليله كانت الفرقا
و قالت لي .. فـ أمــان الله
و ليله ذكرها يبقى
على جرحي .. و لا انساه
و جت تاخذ رسايلها ..
و خصله من جدايلها
و تديني جوباتي
بقايا عمر بسماتي
و قالت لي .. فـ أمــان الله

في ليله كنها الليله عرفتك بسمتي و فجري
و ليله زي ذي الليله و هبتك في الأمل عمري
و يا ليت البسمه ما كانت ولا الاحساس
وياليت الدنيا خانتني و كل الناس
و لا خنتي هواي انتي
و لا قلتي .. فـ أمـان الله

لا تردين الرسايل ويش اسوي بالورق
و كل معنا للمحبه ذاب فيها و احترق
لو تركتيني في ليله بسمتك عند الرحيل
دمعة العين الكحيله عذرها الواهي دليل
و ليله كانت الفرقا
و قالت لي فـ امان الله

________________________________

((الشمس اللي تغيب ))

أركض ورا الشمس .. اللي تغيب ..
ابي النهار .. وينتحي ..
أخاف أنا وجهي الى طاح الظلام ..
فوق الملامح .. ينمحي ..
كافي سواد العين والظل الحزين ..
وشمسٍ تبين .. وماتبين ..
ورا السحاب ..
كافي بَعْض ليلٍ يجي .. قبل الغياب ..
عن ليل الغياب
يا موقد الشمعة ..
وجهي أنا .. أو نور ذا الشمعة ..
قاسي الشحوب ..
في رعشة الضي العليل ..
وتكبر مسافات الهروب ..
يا صاحبي الشمعة غروب ..
به قريةٍ .. تحت الظلام .. مريتها ماجيتها
وبنيةٍ .. تحت الظلام ..
ورسالةٍ في الليل ..
خانتها الحروف .. من القهر شقيتها ..
كلي عيون .. وماتشوف
والناس .. ياظل .. وطيوف ..
والظلما .. نسيان .. الحبيب .. لحبيب ..
أركض ورى الشمس اللي تغيب ..

_________________________

(( السهر والخوف ))

نبي .. نطفي قمرنا ..
لو يعذبنا السهر .. والخوف ..
نبي ننثر قهرنا .. يا حبايبنا ..
على مد النظر .. والشوف ..
نبي ننزع من أعماق الحشا سكين ..
نبي ننزف حنان العاشق المسكين ..
ونجرح في سواد العين .. صورنا ..
ونبي نطفي قمرنا ..
سامحينا يالمحبة .. لو جرحنا وانجرحنا ..
س امحينا لو نسينا .. في الهوى ضحكة فرحنا ..
وآه يالنصل الحرير ..
ياهوى القلب الضرير..
يالجروح اللي مضت .. واللي بتصير ..
نبي ننزع من أعماق الحشا سكين ..
نبي ننزف حنان العاشق المسكين ..
ونجرح في سواد العين .. صورنا ..
ونبي نطفي قمرنا ..

((السكوت الكلام ))

ياحروفنا الملح.. في شفاهنا الحنضل ...
كان السكوت أفضل .. ولا الكلام ؟
قلت اللي في قلبي ..
وخرج الحكي..من الحكي وما عاد..
اخيامنا طويت ..كافي ندق اوتاد
الكلمه .. ماهي انتصار

ولا انكسار ..
كانت حقيقه ..
يوم انقطع حبل الحوار
يا حروفنا الحنضل.. في شفاهنا الملح
زعلوا حبايبنا..كان السكوت أفضل

_________________________

(( الدواير ))

يا رامي المـاء .. بالحـصا.. لأجـل الـدواير.. تكـبر..
لا تـوجـع المـاء .. أكــثر.. هـذي حـدود .. الـمـاء..
يـجـيـبــك الـهــاجــوس .. و يــروح بـك..
يا شــين وش نفع الحكي .. لا روح بـك..
تخـط فالـرمـل البحـر.. وتـرزّ وعـودك .. سـاريه..
وتبـقـى الحـقـيـقــه .. عــاريـه ..
ما عـاد في الـسـفـر الا دوايـر ..
بيـن الـكـواسـر.. والبـدن ..
ماكان لي صـدر.. وما كان لي كـف.. لحـمي تـنتـف ..
ناظـر.. عـلى راسـي تحـوم .. عــقـبـان الهـمــوم ..
وتـرســم دوايـر .. وقـلّ لـي .. وش اللـي صـايـر..
وكانـك حـبيبـي .. فـسّـر الكـون ..
و الا حـبيبـي .. اتـرك الـكـون ..
وقـل لي .. من خـذا منـي محـلي .. ليـن ضـاقـت ..
فسّـر اشـتاقـت.. تـبينـي .. حـدد اقـدامي .. جـبيني ..
و آخـر الجـدب .. العــوايـر ..
واتـرك الـمـاء .. لأشـهــب الـمـاء .. و الـدوايــر..

__________________________

(( الدواير ))

يا رامي المـاء .. بالحـصا.. لأجـل الـدواير.. تكـبر..
لا تـوجـع المـاء .. أكــثر.. هـذي حـدود .. الـمـاء..
يـجـيـبــك الـهــاجــوس .. و يــروح بـك..
يا شــين وش نفع الحكي .. لا روح بـك..
تخـط فالـرمـل البحـر.. وتـرزّ وعـودك .. سـاريه..
وتبـقـى الحـقـيـقــه .. عــاريـه ..
ما عـاد في الـسـفـر الا دوايـر ..
بيـن الـكـواسـر.. والبـدن ..
ماكان لي صـدر.. وما كان لي كـف.. لحـمي تـنتـف ..
ناظـر.. عـلى راسـي تحـوم .. عــقـبـان الهـمــوم ..
وتـرســم دوايـر .. وقـلّ لـي .. وش اللـي صـايـر..
وكانـك حـبيبـي .. فـسّـر الكـون ..
و الا حـبيبـي .. اتـرك الـكـون ..
وقـل لي .. من خـذا منـي محـلي .. ليـن ضـاقـت ..
فسّـر اشـتاقـت.. تـبينـي .. حـدد اقـدامي .. جـبيني ..
و آخـر الجـدب .. العــوايـر ..
واتـرك الـمـاء .. لأشـهــب الـمـاء .. و الـدوايــر..

((أنا إنت ))

انا إنت .. يا إنت أنا ..
لو سألوا حبيبي .. عن إسمي حبيبي ..
قل هذا أنا ..
تشبهني عيونك .. سميني المدى ..
غطيني برموشك .. عن عين العدا ..
ظفرني جدايل .. واكتبني رسايل ..
وانسى من أنا ..
واعدني المدينه .. أوقات الغروب ..
امواجي سفينه .. ورمالي دروب ..
بأمشي لين أشوفك .. لين أقرا بكفوفك ..
إسمي .. ومين أنا ..

__________________________

((أجمل زمانه ))

ما سألته .. إسمه .. عنوانه .. مكانه ..
ومرني .. أجمل زمانه ..
مر في قلبي وراح .. خطوته مست جراح ..
آه .. مديت النظر .. وآه .. جرحني النظر ..
وما سألته كيف .. ضيعته خجل ..
يا إنت .. خبرني من إنت ..
جرحتني وين الدوا .. وين إنت ..
انامين انادي .. وليه أنادي ..
من أي وادي العطر ..
من أي شمس النور ..
ولا الشجن من أي شارع ..
وما سألته كيف .. ضيعته خجل ..
ما سألته ما مداني .. كلها كانت ثواني ..
حرف من خوفي قتلته ..
وحرف عانقني وعصاني ..
بس وقفت فـ مكاني ..
آه .. مديت النظر .. وآه .. جرحني النظر ..
وما سألته كيف .. ضيعته خجل ..

((اكذب ))

صحيح اني انسى الحوداث.. والملامح .. والأسامي
لما أكتب عن آلامي .. شعر ابعد ما يكون ..
عن مجرد جرح دامي .. والأساور .. والمرايه .. والهوى القاسي الحنون ..
عندي هموم القصيدة .. غامضة .. صعبة .. عنيده ..
وانت عاشق للوضوح ..
يتعبك بحري ظلامي ..
ودك بسري أبوح .. وانا آخر همي بوح ..
تكفى لا تزيد فـ خصامي .. وقلي ما تفهم كلامي ..
انا انسى .. الحوادث .. والملامح .. والأسامي ..

2

لما أكتب أغنية مثل (الرسايل ) .. وانا أكذب ..
والخيال العذب كذب ..
كنت لازم أخفي سري وما اقول ..
إن هالمرة شعوري .. هو خيالات الحقول ..
تطرد اسراب الطيور .. عن حقيقة .. عن شعور
ما هو في حب السنابل .. انما تحت الجذور ..
كسروا العشاق بابي .. قطعوا لحمي ثيابي ..
خلعوا الأدراج .. طاحت مزهرياتي الجميلة ..
شققوا جفني كتابي ..وسألو وين ( الجديلة )
( وبسمة العين الكحيلة ) .. ما لقوا في بيتي إلا ..
ما لقوا في صدري إلا.. مالقوا في قلبي إلا ..
أمنياتي المستحيلة ..
وإني احلم .. بس أحلم ..
3
أعبر الشارع معاي .. في الرصيف الثاني قهوة ..
فيها اربع طاولات .. وحده اجلس فيها وحدي ..
ووحده للي يجي بعدي .. ووحدة لأجمل حرف عندي ..
أما رابع وحدة دايم للي مات ..
زحمة .. لكن كل من في القهوة ربعي .. كلهم ..همي ودمعي ..
ليه ما تجلس مكاني .. وهذا شوفي .. هذا سمعي ..
أطلب اقلام ودفاتر .. حاول اكتب عن حقيقة ..
ما هي وجه .. ولا مكان .. ولا دقيقة ..
أدخل الزحمة فـ ضميرك ..
لا تلفّت .. وانت ما في القهوه غيرك .. غمض الدنيا ..
وأكتب .. وإن سأل في يوم سائل .. عن معاني .. عن شعور ..
قله مابين السطور ..
وإلا تدري .. قله أكذب

_____________________________

((انتي المزين))

شبي الونس واملي الهبايب بالاصوات
وعدي ضواري وحشتي عن ضلوعي
روحي خلا .. سكانها خوف وسكات
وليلٍ ملا قلبي .. ظلامه يروعي
ما هوب صدري .. ذي مداهيل الآهات
وماهوب جفني .. ذي مقابر دموعي
حبيبتي وان قلتها بعض الأوقات
من عزتي .. ماهي ترى من خضوعي
أهواك لي فوق الشواهيق رايات
وعلى حصون الياس تزحف جموعي
واهواك ورقاب المغلين محنات
واننتي المزين تنتخيني فروعي
واهواك مراتٍ .. واعاتبك مرات
بالله .. لا تبكين بردي وجوعي
إن طحت فـ اطوي الياس من حب الأموات
هذا رحيلي عنك.. واتلى رجوعي

(( اربع ليال ))

من اربع ليال ...
طيقك وقف ...
ما بين الرمش ... والرمش ...
ما غمضت لي عين ...
يا ابن الحلال ...
اما استرح ... والا امش ...
من أربع لال ... في مجلسي منك خيال ...
وفوق الجرايد والكتب ... اسمك حروفه تنكتب ...
يا ابن الحلال ...
اما استرح ... والا امش ...
من اربع ليال ... هبت من ديارك شمال ...
بريح الخزامى ... والنفل ...
أنا الظما ... انتي الأمل ...
داري لها عامين ... ما ربعت ...
وما غمضت لي عين ...

_______________________________

((الجريده ))

الجريده ..
ادري وش سر الجريده
به أحد .. يقطع وريده ..
وينزف أخبارٍ جديده ..
وحنا نقراها الصباح ..
دنيا مكتوبه فـ ورق .. دنيا من دم .. وعرق ..
دنيا مجنونه ارق .. وهم ..
انسرق .. إحترق .. المهم
كلها أخبارٍ سعيده
وحنا نقرلها الصباح ..
لو طبعنا .. صفحة ما فيها خبر ..
لا حروف .. ولا صور
صفحة يملاها البياض ..
صفحة تملانا بياض .. ما يعكرها الحبر ..
كان ذي الصفحة الوحيدة
اللي اقراها الصباح .. في الجريدة

((اغفر لي الزله ))

أبيك في كلمةٍ لو هي خطا تغفـر لي الزله
وردتك ظاميٍ وان عز وصـلك بااقطع حبالي
أحبك ذا ترى أول كلامي .. وآخره كله
ولكن وش يضر اليـوم لو تدري عن احوالي
وخذ ما جـاز لك من هالحكـي واللي تبي خلـه
انا لا قلت ما في خاطري والله ما بالي
ظلال العاشق جروحه ومن ما يتبعه ظله
أمانة يا شعاع الشمس لا تغضب من ظلالي
وتقـدر تطـوي الدرب البعيد وتقـدر تفـّله
ولكن صعب تمنع في الهـوى صبري وترحالي
وتقـدر تغمد السيـف الرهيف وتقـدر تسلّه
ولكن عـند خلاّق البرية علم الأجالي
متى عمرك سمعت بعاشق قد مات من غلّه
هذاك الحاسد وراعي الهوى تتلفه الأمالي
حبيبي من يعـزك في الهوى ما تقدر تذله
ترى قربك يزيدك بالغلا وان عفتني غالي

___________________________________

((أنا النخيل ))

بين القلم وأصابعي والورق شوق
عشرين حولٍ .. من كتبت القصايد
من يوم بان القلب .. واخفيت بالموق
دمع .. وغـدالي بالمحبه .. وعايد
كتبت ما كني على الشعر مسبوق
وقريت ماكن افـ قصيدي .. جدايد
ونزفت لين اتعبت لا حصل اعروق
وسهرت لين امست نجومي قلايد
وصرت الليالي بين عاشق ومعشوق
وصرت الوصل مابين حاضر وبايد
أنا النخيل وشعري اظلال وعذوق
وانا السحاب اللي على الناس جايد
وفـ ليلةِ حسيت من جرحي اعقوق
وقف النزيف وما بذي له عوايد
صار الورق مابين مهمل ومشقوق
وحار القلم ما بين ناقص و زايد
من الشعر مليت ياحادي النوق
و من الجروح اللي .. تمل الضمايد
و من الحروف ونقصها مع هل السوق
وكذب الحسود .. وهم راعي المكايد
ومجاد لي في كل ساذج ومطروق
وخوفي على غر المعاني الفرايد
عشر السنين وعشر .. والجوف محروق
ما غير أشب أطراف ليلي وقايد
مانيب ادور من ورى نزفي احقوق
و لا ابي من سهر عيني فوايد
لو ما بقالي في الملا غير مخلوق
لا من ذكر شعري .. جفته الوسايد
كني بجبين الشمس .. والليل مفروق
وكني بدمعٍ .. فوق خده نضايد
افداه عمرى .. ماشكى صاحبه عوق
لاشك ما في النفس لو قيل كايد

(( البتول ))

كـل أرضٍ تشيلك يـا ثـقيـل الحمــول
وكل وقتٍ كريمٍ بالرضا والزعل
وين مـارحت تلقى لك حبيب وعـذول
وين ما كنت تلقى مثل ياسـك..أمل
ياطـريق الترجي والوله والـنـحول
والله إني مـشيـتـك... لـين حد الـثـمل
مالقيت فوصولي لغـير قــبري وصول
ولا عـرفت فـحياتي مثل عرفي الجهـل
لا تظـن المـسافر مـن يسوق الـرحول
مـن وقف دون حلمه عاجزٍ ما رحـل
وما لمخلوق منجا في الحذر والجـفول
مـا تـصيب السـهام ولا يـطـيـش الاجــل
الـلـيـالي خـــــوات.. مــير مـنـهـي البـتــــول
والحــوادث عـشــــايـر مـير ويــن الفـحـل
ليلةٍ لـك .. وليله بـالفـــرح مــا تـطـــــــول
ولـيـلـةٍ مـن شــهــدهــا ذب راس الــجبـــل
أتذكّر في عين الشمس طفــلٍ خـجـــول
شـالـتـه فــي هــدبــهــا وقـت لــين إشـتـعــل
أعجب الناس وهجـــه بالجــدل والفـضــــول
ما دروا عن (جمـــال الجـرح) لــين إنـدمــل
والله اني كتـبـتـه في العطــش والذبـــــول
لــين غــصــنــه تــعـــدل بـالــورق وإعـتــدل
والله إنـي كــتـبـتـه لــــين قـــــــال الجـهــــــول
والله إنـي كـتـبـتـه وانــتــشـى واحـتـفــل
ما أتفه الشعر كانه هالحكي اللي نقول
لا تـعـدى الــمــــديــح ولا تـعــدى الـغـزل
إن لثمت الزهــــــور وصــــاحبتني الحقــــول
مـاهقيت ان صافـي الشهـد عيب النحل
مابقى في ضلـوعي كود ريـح مـعـمــــول
وثــــوب شـاشٍ عـليه مــن النــدامـه وحــل
ألـتـفـت للـطــــريــــق ومــا عـــبر مــنــه زول
فـــي جـفــوني تـزاحم عبرتي والـوجــل
طـلـت يالعـمر والا قــلــعـتـك لا تـطـــــــول
طــاولــتـنــا الـلـيــالي بالـســــهــر والــمــــلـل
إن تـعـبـنــــا نـــحـب ولا لــقــيــنــا قـبـــــــــول
مـا تــسـر الامـــانـي .. ولا يـفيـد الـعــذل
لكن .. الله كريم وكل همٍ يزول
مـا على الله بعيد .. ولا جـفـاك الـمـحـل
كـل أرضٍ تشيلك .. يـا ثـقيـل الحمــول
وكل وقتٍ كريمٍ بالرضا والزعل

__________________________________

((انا الجفا))

عن كل نجم ظهر بسدل أجفاني
لعل ما عيش حزني لحظة غروبه
وعن كل خلٍِ طويل الصمت كفاني
الصاحب اللي قليل الهرج عذروبه
وعن كل ثوبٍ جديد باالبس أكفاني
وأدله ولا ألقى رسايل هم في جيوبه
أنا الجفا ليه أخاف الناس تجفاني
وأنا الحبيب الذي من يعشق عيوبه
راعي الوعد وأن صدق مرة ولاقاني
يحتار بين السراب وقلب محبوبه
يامن عذابه يشققني ويرفاني
فرقاك غصب علي بالحيل مكتوبه
خبرت نصف تعب من نصفه الثاني
بعضي الرماد وبعضي نار مشبوبه

((الله يحبك ))

الله يحبك كثر ما شقّق البرق
سود الدياجي وانبت الغيث وارق
والله يثيبك كثر ما بان من شرق
نجمٍٍ وغاب فـ لجة الغرب شارق
ياسدرةٍ في نجد يلقى بها الورْق
للنوح غصن وللمعالي بيارق
لك الشموخ لباس.. عاليك للعِرق
وباقي النساء خرص الذهب والعشارق
والله ما مثلك كتم آهة الحرق
وما كن مسّك من لياليه حارق
وقتٍ إلى منه كسر رمحه الزرق
بالنار يودع في الحنايا مطارق
ياهيه حوّل مثل ما تشتهي وإرق
وإفطن لقبرك بين هاك المفارق
الوقت يسرق باقي أعمارنا سرق
ما نجتمع .. إلا وحنا نفارق
ياعمتي بعض العزا يتعب الطرق
ما ينكتب والحرف بالدمع غارق
كل شكى لوعة لياليه والفرق
في اللي يبي ما عند رب المشارق

((البدر .........اهداها الى صاحبة السمو الملكي الأميرة
البندري بنت عبدالعزيز بن عبدالرحمن آل سعود

((انفاس ))

يازين مافي العيون نعاس
والقلب مشغول بهمومه
اما معي نطرد الهوجاس
والا لك النوم وحلومه
هذي نجوم السما .. جلاس
وعيبٍ على العاشق القومه
لاجل الهوى عذبونا الناس
ومن بيح السد ما الومه
انفاسنا ماغدت انفاس
من حرها دوم مكتومه

_______________________

(( الله يرد خطاك ))

الله يرد خطاك لدروب خلانك ..
لعيون ما تنساك لو طال هجرانك ..
دام الأمل موجود فالنفس خضاعه ..
حق العيون السود السمع والطاعه

الله يردك لي .. يا مطول غيابه ..
يا معـذبي هجري .. مدري وش أسبابه ..
دام الأمل موجود .. فالنفس خضاعه ..
حق العيون السود السمع و الطاعه ..

ياللي بعدك اليوم .. نبكي على باكر ..
صبري عليك يدوم .. مادمت أنا فاكر ..
إن الأمل موجود .. فالنفس خضاعه ..
حق العيون السود السمع و الطاعه ..

(( أغنية في العشق والموت ))

ضمي مَلامح صورته ..
ضميه .. لعله يفيق ..
يَشهق .. أو يَردّ النَّفسْ ..
ضمّيه لعَله حبس ..
صٌوته .. رعشة عرٌوقه ..
وخيم حزين الصمت فُوقه ..
مات .. مات
من قبل ما يكتب له فـ قٌربك حياة ..
من لبسه ثوب البياض ..
من سبل عيٌونه ..
مسح غبرة جبينه ..
وش يفيد ..
اللي زرع نصلٍ حديد ..
في قلبه الطيّب نسى ..
قولي عسى .. ما تلمحي ..
فـ طرف ثُوبك له دما ..
يا خٌوفتي .. اللي سبح في نهرك الجَارف ..
غد اموته ظما ..
ضمّي ملامح صورته ..
ضمّيه لعله يفيق ..
يشهق أو يرد النفس ..
صوته جرس ..
ينحب على بوابة الليل ..
يوقظ خدر جرحك ..
يتل من عينك احبال الدّمع
ضمّيه لعله سمع ..
انك تحبينه ..
ولا ..قلتي تحبيه ..
ولا .. قلتي تحبيه ..

_____________________

(( إنشد البحار ))

أنشد البحار على سر الحنين
عن قصيد البحر .. وجروح السفين
عن حبال الشوق تظمأ للشطوط
عن حروق الملح في شفاه السنين
ما عرفت الغوص في اليم المخيف
ولا رهنت العمر في الدر الثمين
جيت أنا من نجد .. في قلبي الرياض
وفي عروقي التهم .. والبيت الأمين
في كفوفي تصرم نخيل الحسا
ومن ذواري الرمل غادي لي جبين
جيتكم .. والعشق يطرحني سؤال
هو صحيح الشط له صدر ويدين
عانقتني بيوتكم .. وأنا بعيد
ما عبرت الجسر .. ما شفت القطين
ياهوى البحرين مريت الديار
عابرٍ والقلب باللهفة ضنين
لين حطت بي رحالي في هواك
وانبعث نبع المحبة في الكنين

((أبي النسيان ))

تذكرتك .. وأبي النسيان ألايا خل ساعدني
أنا مالي ورى الذكرى .. إلى مات الأمل خيره
أنا ودي على الفرقا حبيبي لو تعاهدني
وإلى شفتك .. تصد ولاتجيب لما مضى سيره
تخيّر غير هذي الأرض .. مكانٍ به تواعدني
تخيّر لك مكانٍ صعب .. أعرف فيوم تقديره
عسى الجرح الذي يدينك أشوفه عنك يبعدني
أنا اللي أكرهك .. وأحبك .. شعورٍ صعب تفسيره
حسيبك .. يالهوى الظالم .. حسيبك لاتعاندني
بيلقى صاحبي غيري وأباالقى في العرب غيره

____________________________

((إنطلاق ))

* راج ..
طيري في السما ..
شالته امواج الرياح ..
يا ترى وين نيته ..
انتزع حريته ..
وخانني مع السحابه .. والعجاج ..
انشر فْـ كل السما ..
ريش جنحانك ..
يا طيري اللي عذبتك ...
قيود خلانك ..
كل زادٍ .. وانت في الاغلال جوع ..
وكل شربٍٍ وانت في سجنك هماج ..
يا رفيق الخير ..
لك حق تختار ..
بين الديار .. ديار ..
وبين الاهل صحاب ..
وبعض العمار قفار ..
راج طيري في السديم ودار ..
(لاواحلالاه ياطيري)

*راج:طار في السماء

((أجمل الحزن ))

يا اجمل الحزن .. لدموعك سلام
من حبيبٍ ... بقى منه الكلام
وين انا منك .. غربني الزمان
وخانني النور ... وابعدني الظلام
لو بعزيك ... سالت دمعتي
تدري الدمع في حبك ... حرام
لو بواسيك ... مايكفي الهوى
ولو أبي ... عذر مايكفي الغرام
أعطنى من عذابك يا البعيد
صرخةٍ ... تجعل ظلوعي حطام
آه ...لو في يدي أبكي معاك
قطرةٍ مادرى عنها الغمام
ماابخل الوقت ... يحرمني البكا
وانت لجلك حرمني الإبتسام
يا اطهر الحزن ... لو كان القصيد
يكشف الغم عن بدر التمام
لكتب الشمس شعرٍ في سناك
وامحي إمن السما...عج وكتام
ياعسي البدر نوره مايغيب
عن حبيبٍ بقي منه الكلام

____________________________

((الاختيار ))

ودي اختار.. الليله درب ..
ما تعرفه ..
ودي اجلس في مكان ..
ما يذكرني بصدفه ..
أو وعد ..
ودي أحكي يا حبيبي .. مع احد ..
غيرك احد ..
لجل النهار .. وحريتي ..
اعطيني .. لحظة اختيار ..
وحدي وغديت أنت الزحام ..
وحدي أبد .. وانت الكلام ..
نورك وما غيره .. ظلام ..
عذب الحروف .. طاغي الطيوف ..
أبعد عن عيوني .. بااشوف ..
لجل النهار .. وحريتي ..
اعطيني .. لحظة اختيار ..
ابي درب .. مايوصلني لدارك ..
ابي وعد .. ماحتمل فيه انتظارك ..
وابي ليل .. مايجي بعده نهارك ..
ودي ادري .. هي حياتي ..
اختياري .. أو اختيارك ..
ودي انسى .. ليله وعدك .. أنسى وعدك .. ماأجيك ..
وش يضرك .. لواخونك .. مره واختارك عليك

((الخل العنيد ))

تل قلبي .. تل طيرٍ على طلعٍ وكيد
جود المقرود سبقه وعيا يطلقه
يوم فاع اركى جناحه على قاسي الحديد
وانكسر ريش النداوي ولا الله وفقه
يكفخ القلب المشقي على الخل العنيد
ما وفا بالعهد لا شك قلبي صدقه
واهني اللي على الحول ينبت له جديد
وش سواة اللي جناحين قلبه محرقه
يا لطيف الروح وبحق خلاق العبيد
اكرم المملوك بالوصل والا فاعتقه

_____________________________

((اغصان المساويك ))

تجلس عجوز .. في اول السوق ..
وبين الشبابيك .. وتبيع السوالف ..
وأغصان المساويك ..
ومايخالف .. لو باعتني الحكي ..
الحكي غالي هــ الايام ..
مريتها .. ابي الكلام ..
قلت : ياخاله أنا ..
ان نسوني الناس .. زعلت ..
والى اذكروني الناس .. زعلت ..
صمتي وحروفي مبعثره ..
ضحكت وقالت :
لو عدلت .. سلمت قلب وحنجره ..
ماعطيتها فلوس على هذا التعب ..
وماريحتني من التعب ..
قمت وعلى عيوني غباش ..
مدت لي مسواك جديد ..
عييت ..
وقالت لي بلاش ..
ان كانت سنونك نظاف ..
حطه في جيبك ياولدي ..
يجلي محانيك الرهاف ..
من كل اأحساس ردي ..

(( اقول أحبك ))

قالوا حروفي عمي وعيونك بروق
مافي قصيدي جنح ليلٍ وبارق
قلت الذي له داخل ضلوعي حروق
أقرب من اللي في سما الناس شارق
غيري يشوفك وأجود الشعر مطروق
وأنا أحسـّك وأصدق الحب فارق
ياللي عيونك دم وعيونك عروق
ولهاث قلبٍ فـي نواعسك غارق
أقول أحبك يخرج البحر صندوق
تبرالغزاة وكنز سود البيارق
وأقول أحبك صدرالايام مشقوق
عن وجه غرناطه وعن مهر طارق
وأقول أحبك والله إني من الشوق
ألقا طيوفك في جميع المفارق
كتبت لك قلبٍ من القلب مسروق
ولا طاب لي وصفٍ من الوصف سارق

__________________________________________________ ________

(( أوقات ))

أوقات ياخذنا الحكي ..
وننسى بالحكي أوقات ..
واوقات .. يا ليت الكلام سكات ..
يجرحنا الحكي ..
اسهر .. مع حبيبي .. يا قمر الكلام ..
لين يغفى حبيبي .. وجروحي تنام ..
ابعد عن حروفي .. وعن المي وخوفي ..
وابحر في سفينه .. عن بحر الظلام ..
وصلنامدينه .. من عطر وغمام
انا وين القى كلام .. ما مر فــ كلام
اوقات .. يا ليت الكلام سكات ..
يجرحنا الحكي ..
بغني لعيونك .. في حزني وفرحي
وبكتب عيونك .. قصيده لجرحي
واخلي ابتسامك .. دموعك كلامك
قمر هالسوالف في ليل السكوت ..
ولو الف نجمه في عيني تموت ..
في حزني أحبك .. ويأسي أحبك ..
أحبك .. مأقول أوقات

(( الجدران ))

المنزل ثلاث جدران .. ورابع ..
ما بينهم ضايع .. متشقق وعاري ..
ويميزه شباك .. ضيق ..
مصبوغ.. بالأحمر الناري ..
ومحاصرٍ باسلاك .. علقت بها وردة ..
أوراقها المنزل .. والبرعم الأفلاك ..
***
وعلى الجدار الثاني ..
وأمثال .. وأغاني
مكتوبة بكسرة فحم ..
وصندوق خشب ..
مزخرف بغير الذهب .. غير الجواهر ..
تحت الكتابه نافر ..
فوقه ظلالٍ عريق ..
مثل العنيد .. من الجروح ..
مثل السيوف اللي مقابضها حديد ..
أسرار من ماتوا بعيد ..
وما خلفوا حتى الورق ..

***
أما الثالث من الجدران ..
معلقٍ عليه صورة .. لإنسان ..
من دفتر نفوس .. مكبره ..
مدري جفونه مبخره ..
ولال تجاعيد خيوط .. دخان
وفي الركن كرسي خيزران ..
يجلس عليها الوقت ..
وجريدة ٍ عنوانها باهت .. تغفى على الإسمنت ..
وفوقها كوب فارغ .. وفتات خبز ..
وأصابع ٍ للجوع صفرا مكسره ..

***
ويبقى الجدار الأول ..
وهو أعرض الجدران .. وأكثرها وقار ..
وهو الوحيد اللي انبنا فـ نور النهار ..
بوابته على الطريق الرملي ..
صَفت أحجار درجها .. بصبر ..
وش كنها .. ؟؟
سنونٍ صفر .. في فمٍ مذهول ..
وظلما تشدك للدخول .. تشدك ..
وكل ما مسكت اكرة الباب النحاس بيدك ..
تلطخت بدم ٍ طري ..
الجرح نزفٍ يحتري .. أما الطعون ..
وين الطعون .. راحت ..

***
البيت ثلاث جدران .. ورابع ..
مالهم طابع .. يجمعهم ..
يشبهون أهلهم ..
وما صادفوا غير الحياة ..

(( أحبابك سروا ))

مابه احد غيري يابنت.. احبابك سروا..
لاتسأليني تغيروا.. يمكن نسوا او مادروا..
ياحلوتي ضاع الوعد.. وباكر بعد..
مري على دروب الجراح.. وتلقين احد غيري..

بالله لاتبكين عندي.. والى رحتي سوى اللي تبين
مالك عزى.. فـ قلبي الحزين
محتار انا اسكت.. ومدري ايش اقول
لاني سبب جرحك.. ولاعندي الحلول
لكن ابوصيك بصبر.. لابد للغايب عذر
وياحلوتي ضاع الوعد.. وباكر بعد...
مري على دروب الجراح.. وتلقين احد غيري

غطي سنا خدك بشال الليل..
وغيبي ياشمس اللي ضيها لغيري..
اه .. لو تعرفي وش كثر انا احبك.. لو كنتي تدري بي
ياعيونها السود.. مابه احد موجود.. غيري انا الموعود
جرحي.. وتعذيبي..
ياحلوتي ضاع الوعد.. وباكر بعد...
مري على دروب الجراح.. وتلقين احد غيري...

__________________________________________

((أول الناس))

اول الناس انتي .. وكلهم ..
وآخر اللي عيوني .. تملهم ..
لو تحبيني .. هذا يكفيني ..
اسكني عيني .. ونامي ..
انتي يانوري .. وظلامي ..
ياقمرهم .. كلهم ..
أعدل الناس .. وازينهم خجل ..
واغلى من الناس .. في وقت الزعل ..
واجمل اللي حصل لي .. وماحصل ..
لو تحبيني .. هذا يكفيني ..

((انتي اللي وحدك لي))

كل الحرير اللي في الأرض ..
ما يلمس الجلد ..
وكل الرخام ..ما تاطى القدم ..
والعطر .. ما طال النسم ..
حبيبتي ..واغلى الجواهر جيد ..
وكثر الذهب ..والغيد ..
انتي اللي وحدك لي ..
حبيبتي تغار ..
والدر في المحار ..
والمحار في اليم
واليم في الأعصار ..
ومابه شعور اقدم ..
من لهفة البحار ..
ساعة يغيب النور ..
وفي الشط .. خيط اقصور ..
لبيت ومره صغار ..
جفت حروف الما ..
وباقي في صدري الملح ..
قومي إغسلي سفري ..
إن طال بي الترحال ..
كل المواني احبال ..
تربطني بعيونك ..
وشلون أنا اخونك ..
وأنتي اللي وحدك لي ..

_______________________________________

(( الله اقوى ))

الله أقوى غدا شوفك سراب
كيف أبا أروي حنيني .. بالظما
يا ممنى حياتي .. بالسحاب
وين غيث المحبه .. ما هما
اجدبت بالحشا أرض العذاب
واشتكت من تجافيك السما
كيف ترضى عليّ .. طول الغياب
وانت حبك جرى مجرى الدما
يا حبيبي ذوى قلبي وذاب
من عذابــه وبيح ما كما
وعل عينٍ .. رضت فيك العتاب
تشتكي بعد نوره مـ العمَ

((الا الهوى ))

ابعتذر ... عن كل شيء ...
إلا الهوى .. ما للهوى عندي عذر ..
ابعتذر .. عن أي شي ..
إلا الجراح .. ما للجراح إلا الصبر ..
إن ضايقك اني على بابك أمرّ ...
ليلة ألم ... واني على دربك مشيت عمري وأنا
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
ا تصدقي ... ما اخترت أنا أحبك ...
ما احدٍ يحب اللي يبي ...
سكنتي جروحي غصب ...
ياحبي المرّ ... العذب ...
ليت الهوى وانتي ... كذب ...
كان اعتذر لك عن هواي ...
ما أقول أنا ... كوني معاي ...
ان ضايقك اني على بابك أمرّ ...
ليلة ألم ...
واني على دربك مشيت عمري وأنا ...
قلبي القدم ...
ابعتذر ... ابعتذر ... كلي ندم ...
عن كل شيء ... إلا الهوى ...
ما للهوى عندي عذر ...
الله كريم .. حبك ... يكون ...
همي القديم ...
وجرحي القديم ...
والله عليم ... يا أحلى العيون ...
ان الفراق ... جزا الفراق ...
ابوعدك ... كان الطريق بيبعدك ...
بامشي الطريق ...
وكان الجحود بيسعدك ...
مالي رفيق ...
ابجمع أوراق السنين ... وأودعك ...
كان الفراق اللي تبين ... الله معك ...

((انتي حلم ))

انتظرتك .. عمري كله .. وانتي حلم
ومرت الايام والله .. وانتي حلم..
ليه تأخرتي علي ..
توهي مره واسالي ..
كوني في غير الزمان .. والا في غير المكان
كوني عمري .. عمري كله..
اللي باقي .. واللي كان..
انتظرتك عمري كله .. وانتي حلم ..
كل نجمه شعشعت والقلب عتمه .. كانت انتي ..
كل حرفٍ حرك شفاهي بكلمه .. عنك انتي ..
وكل حبي اللي مضى والحب قسمه .. منك انتي ..
كانوا الاحباب ظلك .. بعض احساسك ونورك ..
ما عرفتك يوم كلك .. ياللي في غيابك حضورك ..
انتظرتك عمري كله .. وانتي حلم ..
هذا إنتي .. قولي والله إنه إنتي ..
وين غبتي ؟! .. عني هذا الوقت كله ..
وين كنتي ؟! ..
شيبت عيني طيوفك .. وما أصدق إني أشوفك ..
ياللي قلبي في كفوفك .. نقش حنا ..
وفي جديلك عطر ورد ..
آتمنى .. لو تكوني في فراغ اعيوني وعنى
وفي سموم ضلوعي برد ..
ليه تأخرتي علي ..
وما طرى لك تسألي ..
ليه نأخرتي علي .. وما طرى لك تسألي ..
إنتظرتك عمري كله عمري كله .. وانتي حلم

((الأربعين ))

ادري ان الوقت يذهب ما يعود
اربعينٍ فارقتني يالعنود
ماطر الايام من غيم الزمان
ما يبل الريق لو مهما يجود
كم شربته صافيٍ بارد قراح
ما دريت ان الظما سر الوجود
كل شمسٍ تلمس اشجار العمر
تحرق الاوراق وتجف الفنود
وكل ريحٍ تدفع شراع العمر
ينقطع به حبل ويميل العمود
اربعين مرت وتوني صغير
انتظر لعل تصدق لي الوعود
والغريب اني على هذا مغبوط
ادري اني بخير لا شفت الحسود
الزمن يا بنيتي كله زوال
ما تخلد كود لحظات السجود

_______________________________________

(( أستبد ))

استبد..استبد احيان
استمد كل هذا الظلم من ألمي
اتحد من راسي .. لقدمي
واضرب بعواصفي وبزلزالي
واهّدم الناس .. واهدّم بحالي
لين استرد بعض اثيابي من الريح
ولحمي من الشوك..
وابتعد..ابتعد
واحيان ما املك العواصف .. ولا الزلزال
ولا حتى .. فـ الهجير .. ظلال
لكن استبد..استبد باللي عندي
اضرب بيدي فـ الهوى..بجبيني فـ الصخر
لين اتعب ..اتعب..وانهمد
مثل طفل اضناه البكا.. والسهر
وانتي آخر ماأعد في عمري
واجمل ما أعد
اعشقي ظلم الغصون الخضر للحطاب
والجلد للأنياب..والجفن للسكين
اعشقي هـالظالم المسكين...
واتركيني انصهر في الشمس
والا ارتعد في البرد
لكن استبد..واسترد اثيابي من الريح
ولحمي من الشوك
وابتعد .. ابتعد

((اوراق الزمن ))

ادفن يدي .. تحت الثرى ..
واسقيها من جفني ارق ..
يذبل مابين اصابعي ..
عشب و ورق ..
ادفن يدي .. فوق الثرى ..
يلفها برد وسموم ..
واحس بعروقي يبست ..
ما توصل عروقي الثرى ..
ولا تشرب عروقي النجوم
وينبت على جفني سهاد ..
يذبل ورا صدري الشجن ..
اشقق اوراق الزمن ..
وانام ..
في حلقي الليله جفاف ..
شربت أيامي .. ومضت ..
واللي بقى جرحي الوفي ..
في خاطري باب يرد ..
وسراج دوبه ينطفي ..
اغطي الظلمه بظلام ..
كل ما اشد اصابعي ..
على العيون المتعبه ..
جرحٍ ينام .. وجرحٍ شعر بي وانتبه ..
قام وتبعني لشرفة ظلمه بعيد ..
جاني يقاسمني السهاد .. جاني قصيد ..
ادفن يدي تحت الثرى .. فوق الثرى ..
واعيش انا بباقي يدي ..
نصفٍ يموت .. ونصفٍ درى انه يموت ..
يا سيدي .. ربي انا نقطه فـ بحر ..
علمني كيف اهوى الحياه ..
علمني كيف اهوى القدر ..
علمني بإماني اكون ..
يارب .. اكثر من بشر ..

» ديوان الامير الشاعر خالد الفيصل
» ديوان الشاعر الامير عبدالرحمن بن مساعد
» ديوان الشاعر حامد زيد
» ديوان الشاعر سعد علوش ,
» ديوان الشاعر خالد المريخي