ديوان الشاعر حامد زيد

حامد زيد ... في سطور

اولا البطاقة الشخصية:-

الاسم : حامد زيد سعدون فارس العازمي

مواليد 4/فبراير/1977 للميلاد

الحاله الاجتماعيه : متزوج وله ثلاث بنات ( اسماء - ساره - ريم )

المستوى التعليمي حاصل على شهادة دبلوم ادارة من كلية الدراسات التجارية

موظف في وزارة الشؤون الاجتماعيه والعمل بالكويت.

حاصل عاى عضوية ديوانية شعراء النبط الكويتيه بدرجة شاعر ممتاز

ثانيا البدايات الاعلامية :-

كانت بدايته الاولى في الظهور عبر وسائل الاعلام من خلال البرنامج التلفزيوني (ديوانية شعراء النبط ) وذلك في اواخر عام 1996 للميلاد . والبدايه الفعليه بالصحافه من خلال مجلة المختلف في احتفالية العدد المؤوي وكان في نوفمبر 1999 للميلاد .

اطلقت عليه العديد من الالقاب من خلال الصحافه الشعبيه الخليجيه ومن اهم هذه الالقاب ( قنبلة الشعر, شاعر المختلف, شاعر الشباب, شاعر المطولات, شاعر الخناجر )

ثالثا اهم النشاطات الاعلامية :-

1- داخل الكويت :-

*امسية هلا فبراير بتاريخ 5 فبراير 2001 بمشاركة كل من الشاعرين : ضيدان بن قضعان وعياد الشمري

*امسية هلا فبراير بتاريخ 9 فبراير 2002 بمشاركة كل من الشاعره بشاير الشيباني والشاعر حمد السعيد

*امسية هلا فبراير بتاريخ 16 فبراير 2004 بمشاركة الشاعرخالد المريخي

*امسية الهيئه العامه للشباب والرياضه بالتعاون مع جريدة السياسه فيه 12 يونيو 2000 وكان عريف الامسيه الاستاذ على المسعودي

*امسية معرض الكتاب وكانت بمشاركة الشاعر رجا القحطاني فى عام ديسمبر 2000

*الملحمه الوطنيه وكانت بمناسبة مرور عشر سنوات على تحرير الكويت واربعون سنه على الاستقلال وكانت بمشاركة عشر شعراء خمسه من الكويت وشاعر من كل دوله من دول مجلس التعاون وهم كل من :

من دول مجلس التعاون :-

(خلف بن هذال العتيبي) من المملكه العربيه السعوديه(محمد عبدالعال) من مملكة البحرين (هادي القحطاني) من دولة قطر (خالد المعنى) من سلطنة عمان (محمد المر) من دولة الامارات العربيه

ومن الكويت كل من :-

(محمد عبيد العجمي) (سعود الفهد) (شنوف الهرشاني) (طلال السعيد) (وشاعرنا) بالاضافة الى العديد من الامسيات والمهرجانات فى كثير من المحافل فى الكويت

2- خارج دولة الكويت :-

*أمسية مهرجان عباده وإستفاده فى المدينه المنوره فى 25 يونيو 2001

*أمسية مهرجان صيف الطائف وكانت تحت رعاية الأمير / فيصل بن خالد بن عبدالعزير آل سعود بتاريخ 5 يوليو 2001

*أمسية أتحاد طلبت الكويت بالقاهره في اكتوبر 2000

*أمسية عنيزه في ختام مهرجان القصيم السياحي والتي وصل جمهورها الى 8000 شخص في تاريخ 31 يوليو 2003

*أمسية ابوظبي في 15 إكتوبر 2003 تحت رعاية سمو الشيخ فلاح بن زايد بن سلطان آل نهيان

*أمسية صيف أبها في7 أغسطس 2004 تحت رعاية الامير فيصل بن خالد بن عبدالعزيز

*أمسية واشنطن بالولايات المتحدة الامريكية ...وكانت من تنظيم اتحاد طلبة الكويت فرع الولايات المتحدة

*أمسية مانشستر سيتي بالمملكة المتحدة البريطانية ...وكانت من تنظيم اتحاد طلبة الكويت فرع المملكة المتحدة البريطانية

*امسية راس الخيمة بالامارات العربية المتحدة وكانت تحت رعاية ولي عهد راس الخيمة الشيخ احمد بن صقر القاسمي.

رابعا الاصدارات الشعرية :-

الاصدار الاول ديوان مقروء ويحمل اسم أربع خناجر .

الاصدار الثاني والبوم مسموع يحمل أسم شعر حامد زيد .

الاصدار الثالث البوم صوتي يحمل أسم السفينه .

الاصدار الرابع امسية هلا فبراير 2004 للشاعر حامد زيد وخالد المريخي .

الاصدار الخامس امسية أبوظبي وتجمع كل من الشاعر حامد زيد والشاعر سعد علوش .

الاصدار السادس وهو ديوان مطبوع بأسم يقولون مالا يفعلون.

الاصدار السابع البوم صوتي ويحمل اسم البوم الجمهرة وهو الالبوم الاكثر شهرة على مستوى مبيعات كاسيتات الشعر.

القصيده :انتي ولا شيّ

والله وصرتي تستهينين فيني

وانا الذي سويت لك قدر بيديّ

تدرين وش كنتي قبل تعرفيني ؟

ان قلت لك كنتي ولا حاجة شويّ

انا الذي فرشت لك رمش عيني

وعملت منك شي وانتي ولا شيّ

جيت اعشقك ما جيتك لك تحقريني

جيت اسكنك بسمة ما هو بسكنك غيّ

لا صرت عامل لك قدر قدريني

ترا الكرامة صفحة ما لها طيّ

ما دام ما جيتي غلا لا تجيني

نار الجفا عندي ولا الذل بالفيّ

والله لاهجرك قبل لا تهجريني

اجل تبيعيني واجيلك برجليّ

يا تتركين الكبر يا تتركيني

لأن المحبة شي والمهزله شيّ

إن كانت الدعوة غلاي وحنيني

يمكن يزول الحقد ويشعشع الضيّ

لكن حكاية ينحني لك جبيني

في ذمتي ما ينحني لك وانا حيّ

القصيده :أهل الجنوب

وعيني اللي كل ما ذعذع من الغرب هبوب

يحلا لها لون الغروب اللي يذوب قبالها

ويا ويل حالي كل ما يحلالها لون الغروب

تطري لي الريم اللعوب وسالفة ترحالها

وعز الله اني كل ما تطري لي الريم اللعوب

حرمت امد ايدي على حاجة وانا ما اقوالها

من سافرت ريم الفلا صديت عن كل الدروب

ما هو قصور بالعذارى بس ذيك لحالها

من فارقتني ما خطف قلبي من الحور محبوب

ولا لقيت الجادل اللي تستحق احيالها

لأن القلوب ان ما وفت لأحبابها ما هي قلوب

والعشره اللي ما ترد الروح ما نسعى لها

إما الوفى اللي يستر الرجّال من كل العيوب

والا الجفى اللي يستر عيوب العرب في رجالها

ما اقسى من فراق الجنوب الا فراق اهل الجنوب

ويلي على اللي كل ما تزعل تشد رحالها

اللي مذيره العتب لا شبت بصدري شبوب

عييت اراضيها وهي عيت تطول بالها

كانت معي مثل النصيب يحدني من كل صوب

كانت دروبي من متاهات الظلل لظلالها

كانت هروبي لا شعرت اني بحاجه للهروب

كانت سماي اللي ليا ضاقت علي ألجالها

ليه اتحداني وانا في كل الاحوال مغلوب

ليه حرمتني من قهر عذالي وعذالها

ليه اتجاهلني وانا لاني جبان ولا كذوب

ليه ارخصت دمعي وانا اللي ما بكيت الا لها

ما ترحم اللي له سنه كأنه على النار محطوب

ما هزها دمع الفقيد اللي بكته أطلالها

ما خافت تهدم السنين اللي بنتنا طوب..طوب

ما فكرت تشفق على حالي وترحم حالها

قولوا لها لو ما تذوب انا بخليها تذوب

قولوا لها لو ما عنت لي مستعد اعنالها

إليا ادمحت لي هالخطا بدمح لها كل الذنوب

وإن جابت الحسنى معي تبشر بعشر أمثالها

أفرش لها صدري وطن وأجمع لها ضلوعي شعوب

وأرقى لها المكانه اللي ما حد(ن) يرقى لها

إن كاني مخطي فأنا ماني خليّ من العيوب

الذنب يغفر والبشر تجزى بقدر أعمالها

البعد قاسي والفراق يضيق الصدر الرحوب

وانا تعبت ادور الحيله وارد احتالها

قولولها ترجع ترا ماني على الحزن مغصوب

وإلا ترا نذر(ن) علي انه ماهو ب أشوالها

إما تجنب هالهبال وتترك البعد وتتوب

والا بتبشر بالهبال اللي ما هو بهبالها

كافي زعل ترا الظروف مقفله من كل صوب

وأنا حملت من الهموم انواعها واشكالها

يكفيني اني كل ما هبت على صدري هبوب

تحن عيني للجنوب وتلتفت بلحالها

والمشكلة اني كل ما حنت عيوني للجنوب

تطري لي الريم اللعوب وسالفة ترحالها

وعز الله اني كل ما تطري لي الريم اللعوب

حرمت امد ايدي على حاجة وانا ما اقوالها

القصيده :قرم وفقير

منك العذر وعلي المعذره

لا تحسب حساب هجر ولا هجير

كل ذنب بتذنبه بستغفره

واحد(ن) ما يعذرك ما فيه خير

دور بصدري وطن واستعمره

عندك من الضلع الأول للأخير

عيش فيني وادمر اللي تدمره

واعتذرلي واعتبر سرك ف بير

لا تبشرني بجرح وتذخره

لا تعشمني بفرح وتستخير

ولا تنومني بليل وتسهره

ولا تنام الا وانا جفني سهير

خلني مثل النجوم مبعثره

عيش فيني لا شهيق ولا زفير

لا تقول العفو عند المقدره

خل قلبك صلب وحسابك عسير

المسامح والزعل للمبزره

والا انا لاني زعول ولا صغير

ودي ادري ليه للحزن ثمره

ودي اقطف من قساوتك العبير

ودي اجفل من فراقك واحذره

ودي اعرف لو زعلت شيب يصير

لو تقدر خاطري صدق اكسره

لو صحيح تحبني لا تستشير

ازرع بقلبي سبب يستنفره

اثبت انك غير وان الناس غير

شاعرك ما كل بنت تجرجره

حارت ابه عقول ناس(ن) ما تحير

النسا ما حركوا فيه شعره

ثار عشق وما لقى شي يثير

لو سكت شفت الوقار بمنبره

وان تكلم زمهرير بزمهرير

ما يحضر إلا القلوب مجمهره

وما يغيب الا وعشاقه كثير

إن هجرته تستقر بمحجره

وإن تبعت رضاه ما عينت خير

إعشقه لكن بعد ما تقهره

إبتسم له بس لا شفته كسير

حن لكن حن لا جبت خبره

حب لكن خل حبك بالاخير

لو عطيته وجهك أعطاك ظهره

صد عنه ويتبعك مثل الضرير

لا تحاول تكسبه ما تخسره

صير ثلج يصير لك مثل السعير

ما تميل الا الغصون المثمره

وما يسيل من الجروح الا الغزير

من قبل ما تنقهر منه اقهره

قبل لا يستحقرك خلك حقير

اسكنه حرك جموده بعثره

اعشق اكره عاتب اشره حن غير

انثره لملمه.. لملمه انثره

صد.. ياخي طير لو تقدر تطير

من متى وانا اتحرى لي مره

تثبت اني لا وقعت اوقع كبير

ابك انا مقطوع من غصن شجره

لا صديق ولا رفيق ولا عشير

بدوي(ن) شيب الصبر شعره

ما عرف ريش النعام ولا الحرير

إن غفا كأن السحاب يدثره

وإن صحى يفرش من الرمضا حصير

ماخذ(ن) من قسوة البيد أكثره

ومن شموخ البدو شر(ن) مستطير

جنته صحراه والشوك زهره

والسراب بنظرته مثل الغدير

إن فزع يا مشجعه يا مظفره

من خلقه الله وهو قرم وفقير

كان ما تقدره قل ما تقدره

صير غالي صدق والا لا تصير

الغلا اللي ما تزعزعه اهجره

دام قلبك لا يجار ولا يجير

شوف لك رجل(ن) بليد استحقره

واجد اللي يعشقون بلا ضمير

بس انا لو جبت لي مية مره

ما تحرك فيّ شعره لو تطير

القصيده :تزعلين وتقعدين

عافت الشمس المدينة وأعلنت وقت الزوال
رغبةٍ للنوم منها مع عيون الناعسين

أبعدت من يوم شافت بالسما ضيّ الهلال
كنّها كانت تهزّا بالهلال وتستهين

كفكفت صبح التلاقي من ورا روس الجبال
واستخارتني وراحت وابعدت عن كل عين

وانتي أخطيتي خطاها وانعزلتي بالوصال
ولا رحلتي من سكات ولا وعدتيني تجين

عشت عمري بالمحبة في سبيل الاحتمال
وانتي تعيشين عمرك تفرحين وتجرحين

من غرورك في جمالك ما عطيتيني مجال
وأدري إنك تفهميني لو بغيتي تفهمين

كيف أشوف الشمس تشرق بالسما وانت ظلال ؟
ومن يعيش بوسط غارٍ للذياب الجايعين ؟

كنت أحسب الكره زايل والجفا لو طال زال
ولا بديتي بالغرام ولا بقى فيني حنين

أشهد إني ما خطيت ولا نويت الانعزال
وما خدعتك في غرامي لين شفتك تخدعين

اصدقي بالوعد مرة لي ولو فيها سؤال
من عرفتك ما أذكر إنك توعدين وتصدقين

كنت أشوفك من عيونك تأمرين أقوى الرجال
والله إني قبل أعرفك ما هقيتك تخضعين

كنت أشوفك تبعدين وقلت من باب الدلال
وإن بعدتي عن عيوني قلت باكر ترجعين

كنتي أكثر في عيوني من عدد وبل الخيال
وين أنا ما الد وجهي كنت أشوفك تضحكين

وإن بغيت أصد عنك من يمين ومن شمال
ما قوت عيني تلفّت لا شمال ولا يمين

عاشقٍ والعشق بلوى وأشهد إن الحال حال
ولا تركتي رحمة الله ولا عرفتي ترحمين

وأدري إنك في غرامي للأسف نلتي منال
افترقنا في دقايق والسبب لعنة لعين

حبك أشبه في غرامي بالوصال الانفصال
ويلعب الخفاق لعبة كبرياء الخاضعين

بالهوى ماهي غريبة نكبة عيال الحلال
ولاني أول من يصون ولا انتي آخر من يهين

الصداقة في عيون الناس منفى للعدال
وكان ردّت للصراحة كلبونا مذنبين

المحبة شبه زالت والصداقة لاتزال
بس أببقى في عيونك ( حامد ) اللي تعرفين

علّميها يا قصيدة واضربي فيني مثال
عرفيها بالبداوة في طباع الأولين

علّميها كيف نصنع صبرنا والاحتمال
علّميها كيف نفلح بالعمل دنيا ودين

علّميها في سوالف حلّنا والارتحال
علّميها كيف نظهر جورنا للجايرين

علّميها يا دقايق ، علّميها يا ليال
علّميها يا عصور وعلّميها يا سنين

إن عشقنا ما بغينا غير عشقٍ بالحلال
وإن نوينا ما لفينا كود ناس طيبين

كاملينٍ في عطانا بس لله الكمال
والرجل فينا غرامه لو يعين ويستعين

ابدويٍ ما يقوده للردّى شد الحبال
يعسف اليدّ الشحيحة للعطا حتى تلين

همنا فعل الرجولة رمزنا لبس العقال
وانتي المكياج كله صار في وجهك سجين

عندك المكياج موضة تحسبين إنه جمال
صار همك في حياتك تكشخين وتطلعين

والا أنا قلبي بقى لي بالمحبة راس مال
والله اللي مبتليني بالهوى والله يعين

إن بغيت أعشق أبالقى كثر حبّات الرمال
لكن انتي لو بغيتي صعب مثلي تعشقين

قلت لك كل الصراحة وأختم أطراف الجدال
وإن زعلتي من كلامي تزعلين وتقعدين

القصيده :المباني

جابك الله من غياب ٍ ضيّق صدور المباني
قبل لا الوحشه تزعزع بيتك الصلب وتبيده
بيتك اللي من رحلت وكل جدرانه تعاني
ماتحمل ينتظر شهرين وعيونك بعيده
الله العالم لو إنك جيت متأخر ثواني
ماتشوف إلا بقايا من حصاه ومن حديده
من عرفتك وأنت تايه من مواني لي مواني
وتارك ٍ قلبي مولّع من وقيده في وقيده
ضاعت سنيني أحد بهاليالي وتحداني
وأنت ماتشبع غياب ولاتخاف من النقيده
ودي أتحمد لك الله بالسلامه , مامداني
كل ماتوصل برحله ترجع برحله جديده
دام تدري كل وجه ٍ غير وجه الله فاني
ياخي أكسبلك ثواب وخاف ربك في عبيده
كان فيني عيب قلي:فيني العيب الفلاني
كان هرجي مزعلك في شي قلي:لاتعيده
عيب تصغر في عيوني وأنت برقاب الغواني
كيف تستسهل طعوني وأنت خابرني وليده ؟
لعنبوك أن مت بيدك من يفكك من أخواني ؟
لحزنوا ربعي على فرقاي شاللي تستفيده ؟
أنت منت اللي عشقته أنت أكيد انسان ثاني
ليه صرت بهالبرود وبهالاحاسيس البليده ؟
وين حبك للزعل .وين العناد الأولاني ؟
وين حنّية زمان وفرحة العمر الرغيده ؟
وين ذاك اللي اليا أقبل مايبات إلا بمأني ؟
وين راح اللي اليا أقفى مايروح ألا فقيده ؟
واحد ٍ من جابه الله بس يامر ويعصاني
الوحيد اللي أخافه غصب وأمشي معه سيده
(مابغيت أطيح بيده) لين ماربي بلاني
ولا أنا لو هي بكيفي (مابغيت أطيح بيده)
ذاك بس اللي يامن جيته يلخبط كياني
اللي بنظره ينشف دم قلبي في وريده
قبل أشوفه أجمع اله أحلى القصايد والمعاني
وأن لقيته ماعرفت أقول لي جمله مفيده
الف مره قبله أعد القصيده من لساني
ولعنبوه أن جيت عنده قمت أخربط بالقصيده
أمدحه وأنا أدري أنه لو تباطاني نساني
أنطحه وانا أعرفه مجنون وأفكاره عنيده
من يسوي بي سواتك يالرهيف الاسمراني ؟
منهو من الناس غيرك غلطته ترفع رصيده ؟
من يقص(جناح طيرك)وأنت أعز أنسان جاني ؟
ليه أخاف(رماح غيرك)وأنت ضرباتك سديده ؟
ان تبعتك .أتبعك من طيبي وواسع بطاني
ولا أنا لاجيت أكيد انسان عزالله بكيده
أقدر أنزع لك ثيابي وألبس ثياب الأناني
وأقدر أطلع من عذابي والعب بدورك وأجيده
ومستعد أكسب رهاني لو بغيت أكسب رهاني
وأخدعك بحساس كاذب وأتحدى من يصيده
أبك أنا لي شفت خلّي حط غيري في مكاني
والله إني لتركه وأن صد لعشق سيد سيده
جيت مابيك تحقرني جيت أبيك تعز شاني
جيت أبي فزعة ظلوعك من مشاعرك البليده
خلني داخل (حدودك) وأجبر بخاطر زماني
أكذب بباقي (وعودك) وأصدق بلحظه سعيده
أنتشلني من (برودك) لو تولّع بالمحاني
عطني أحساس (بوجودك) وأخذ كل اللي تريد
تكفى واليا قلت :تكفى بيع خلق الله عشاني
لاتضيّع من يديني فرصة العمر الوحيده
يعلم الله شفت منك ومن غيابك ماكفاني
كان ماتقدر تخفف هم قلبي !! لاتزيده
شف غيابك وش يسوي بالصدور وبالمباني
وأنت تدري كيف كانت صدمت غيابك شديده
والله أنك لو وصلت البيت متأخر ثواني
مالقيت إلا بقايا من حصاه ومن حديده

حــد عــلــمــي

حد علمي بالغلا يوم كنت أسوى كثير
يوم كانت ضحكتي طبع وعنادي سمه

وحد علمي بالغلا يوم خفاقي ضرير
قبل أهدم العشق وأبنيه وأرجع وهدمه

وحد علمي بالبكاء يوم لي قلب وضمير
قبل أشوف المسلم يموت بيد المسلمه

إيه عدّت من يدي بس ماعدّت بخير
ليلةٍ عيّت تجيني وجتني مظلمه

من عرفت إحساسها كن في قلبي نذير
والنهار المكتئب باين ٍ من مقدمه

ليلةٍ حسيتها لاتجور ولاتجير
مثل طفل ٍ ماحقرته وعيّت إحشمه

وأصبحت مثل شعره وأقصمت ظهر البعير
وأبتدى في موته الجرح من حيث إختمه

صارلي بالعشق مالا هقيت أنه يصير
أنظلمت بعشرت أنسان ماكنت إظلمه

العشير اللي تبرى من ضلوع العشير
الحلا عزّز خطاياه والحظ إخدمه

لاتبسّم يكسر النور بعيون البصير
وكن شمس المغربيه تبات إبمبسمه

معتدل في قامته لاطويل ولا قصير
ممتلي بالزين من معصمه لي معصمه

فيه بلوان الهدب لون غير ولون غير
مثل ما للرمش بالعين قصه مبهمه

كنها نكس البيارق على شط وغدير
ومثل لملمت الشتات بشتات اللملمه

مع سواد مجدّل ٍ مايثور إلا يثير
كنه اللي ينهم الريح ثم ٍ تنهمه

ماتجمع لين قيّد حرير ٍ مع حرير
في ضلام ٍ علّم الليل مالم يعلمه

ماهقيت إن الهدب صلف وأجفانه تغير
لين سلهم لعنبوا جد ذيك السلّهمه

ماعتقني لين ساق البشاير للبشير
يوم صد وجاه قلبي بشحمه ولحمه

والله إنه حط قلبي تحت رحمت شطير
في يديه وكل ماراد يقسمه قسمه

ياعساني ماعدم إرضاه في برد وهجير
ولوعدمت مروّته ياعساني معدمه

إن طلب عيني رضا قلت ماغيره نظير
وأنشرب دمي غضب قلت يستاهل فمه

واهنيّه يرقد الليل مرقاد الغرير
كن نومه لابغى يهزم الجفن إهزمه

وإلنا من صفرة عصير الى صفرة عصير
والسّهر يايلزم العين وإلا تلزمه

لو صحيح إن الحبيبين يجمعه مصير
كان نفس اللي حرمني من النوم إحرمه

والله إن مروّتي ولّعت فيني سعير
يوم شفته تل قلبي وداسه بقدمه

مارحم زهرة شبابي وأنا توّي صغير
لين ضيّق خاطري ضيّق الله إنسمه

إيه عدّت من يدي بس ماعدّت بخير
ليلةٍ عيّت تجي بس جتني مضلمه

حد علمي في عناها عذاب وزمهرير
يوم قمت أوحي بالاضلاع صوت وهمهمه

وحد علمي بالرجا من نصير اليا نصير
يوم شفت النّفس تذبح وهي مستسلمه

وحد علمي بالبكا يوم لي قلب وضمير
قبل أشوف المسلم يموت بيد المسلمه

القصيده :ثامن السبع العجايب

اسمعي والكل منا له هواه وله ميوله
لاتمسين بكلامك شعره بروس القرايب

ان حكيتي ما وفيت وان تحديتي عجوله
تحسبين ان كل فعل ٍ تفعله يمناك صايب

تحسبين انك خذيتي بالحش صولة وجولة
تحسبين اني ذكرتك مع نسانيس الهبايب

والله انك لو ذبحتي خافقي لألقاك حوله
عاشقة تشقي بقلب من طريق العشق هايب

كم رضيت اسكت عليك من القهر وانتي زعوله
خايف اضحك وستفزك واهجرك واعيش ذايب

ادعيت انك خجولة وادري ان ما انتي خجولة
وادري انك تخجلين الشمس من فوق السحايب

مايحببني بقلبك ياالهنوف الا فضوله
ولا ينسيني غرامك غير تكرار المصايب

عاشقة جيتي ورحتي يالحبيبه يالعذوله
لابنيتي لي طموح ولا تركتيها خرايب

تستبيحين القلوب وتستحقين البطولة
واستحق اعيش بعدك تايب واموت تايب

ياكثر ماشال قلبي شي اكبر من حموله
ولا عفيتي عن غلاه ولابخل لك بالوهايب

كنه ارحم من همال المزن للزهر بذبوله
وانتي اقسى من هجير القيظ وسموم اللهايب

وانتي ادرى في غلاك بداخلي ش اللي يزوله
وادخلي على الله واحفظي ذيك السبايب

ماخبرت اللحظة اللي حللت قربك تحوله
ولا هقيت اني بشدد للجفا قلب وركايب

ولاهقيت انك تحبين الزلل وانتي جفوله
ولاهقيتك تكرهيني كثر حبك للطلايب

كن قلبي في وصالك وابل ٍلحظة نزوله
وفي فراقك مثل دمعة تنحدر من عين شايب

كنت ابي وقفت حبيبه تنهض القلب بخموله
طامح بالعشق وانتي عايبه والحظ عايب

كنت ابيع الكون واشتري خافقك وظلال زوله
كنت اثور اليا وطيتي بالقدم شهب الترايب

كنت قصن كل كفي غير كفك مايطوله
كنت قلب ودمعتين ودرب وجروح عطايب

كنت ابيع العمر كله ورخصه عرضه وطوله
للعيون الي هدبها ثامن السبع العجايب

بس ابرضي لك غرورك واكسر القلب بذهوله
وقتها ماكنت افكر صايب او كنت خايب

والرجل لو ماتحلى بالشهامه والرجولة
صدقيني صعب يقدر يملك قلوب الحبايب

صدقيني مايوالف خافق البنت بسهوله
بالهوى يابنت حواء غير طلاب النشايب

والسهر والعشق الاول والهوى واللي ينوله
شي اقسى من همومك والعنه حاضر وغايب

والهموم اللي دعتني من بعد سن الطفولة
كلها ( من تحت راس العشق ) ملعون الصلايب

القصيده :الشعــــراء

مابقى الا سود الايام تحرمك الرقاد
كيف الاوهام اتجرأ اتسريك مغبون

من متى تجزع من الدمع وتخاف البعاد؟
من متى تقفي بك ظنون وتجيبك ظنون؟

صرت تاخذ كذبتي صدق، ومزاحي وكاد
لو بقول اني بخونك تحسب اني بخون

ماتعرف ان كل شاعر يهيم بكل واد؟
وانهم دايم يقولون مالا يفعلون؟

ابك انا لاقلت ابنساك وانكرت الوداد
والله اني مانسيتك وولاهم يحزنون

من جزع من صفعة الشمس يطمع بالبراد
ومن فقد وجهاته الخمس يلقى بك ركون

اعتبرها هفوة انسان او كبوة جواد
لو بتسمح فانت غالي ولو تجرح تمون

عد صداتك مروة وطعناتك ضماد
خلهن لاراحن طعون ولا ردن طعون

خنجرك يستاهل الطعن ومتوني شداد
ومنك يازين الخناجر ويا بخت المتون

ردلي حنية المزح باحساس الجماد
خلنا واحد يجي صلب والثاني حنون

موت فيني واندفن فيك بثياب الحداد
وان حييت أموت لرضاك واحيا بك بهون

مره ارقد بالكفن وانت ترقد بالمهاد
ومرة ارقد بالمهد وانت ترقد بالكفون

ادري ان شجونك شجون واعنادك عناد
والبلا ان عنادك عناد وشجونك شجون

ربك اللي سخرك لي تقود وما تقاد
والله الخالق ولله في خلقه شؤون

ازرع ضلوعي من رضاك وابشر بالحصاد
لعنبو من جيت ترضيه وترد امحزون

بس تسوالك بلد ؟ قول تسوالك بلاد
انت كل العالم بكون ولحالك بكون

مابعد محبتك حب ومرادك مراد
غير كونك سيد حشاي تدري من تكون ؟

نعمتين اختصوا الخلق من جود الجواد
كافل الأرزاق من حيث مالا تعلمون

البنون ونعمة المال بعيون العباد
زينة الدنيا بلا شك في كل العيون

مثل زينة دنيتي بس عندي شي زاد
من عرفتك صاروا المال وانت والبنون

انتشي بك نشوة التيه لعناق الرشاد
وافزع الك فزعة القرم لشهاب الزبون

واحصنك تحصين الأرزاق عن درب الفساد
واعشقك عشق المظاليم لفراق السجون

لو تزيد الشوق جمرة تحولني رماد
لو يزيد العشق شعرة بوصل للجنون

خل هقواتك كبيرة ونظراتك بعاد
كانك انت بكبرك تهون من اللي ما يهون ؟

ازعلك وارهن حياتي تحت رحمة زناد
تهبى لا والله الا انت والموت تهبون

عاد اذا ما ارضاك هرجي ولا اللي قلت فاد
اننا لله وانا اليه راجعون

وانت باكر بتعرف على ناس جداد
والكلام يجيك من كل شكل وكل لون

لاتحسب ان كل كلمة بتسمعها وكاد
ولا تصدق هرج شاعر وتخدعك الظنون

دايم اعرف كل شاعر يهيم بكل واد
وان هم دايم يقولون ما لا يفعلون

حتى انا اللي قلت اعشقك وما اطيق البعاد
يمكن اطلع ماعشقتك .. ولا هم يحزنون

القصيده :ماتشوف شر (مقتطفات)

لاباس أنا يالغاليه قلتها لك
من قلب يخلص لك يحبك ويغليك
ياليتني كنت المنوّم بدالك
وليت المرض يابنت فيني ولا فيك

*************************************

القصيده :الكذب خيبة (مقتطفات)

روحي وهالمرّه خلاص لاتردين
هذا الفراق وروحةٍ دون رده
الكذب خيبه ماعرفتي تحبين
ما أنتي من يستحق المودّه
ماتعرفين الحب والعطف واللّين
ولا عاد في قلبي على الحب شده

***********************************

القصيده :صوت الفناجيل (مقتطفات)

ياحبيبي لاتواعد مواعيد وتغيب
دامك تقول المواعيد من غير شهوه
والله إني من عرفتك وسميتك حبيب
أسمع بصوت الفناجيل وماشفت قهوه

*************************************

القصيده :أربع جهات (مقتطفات)

يالحبيبه خفوقي مايبيك ويبيك
أشهد أنك حبيبه غير كل البنات
وين ما ألد وجهي بالطريق التقيك
صرت أخيلك واشوفك في جميع الجهات

***********************************

القصيده :ملعون ابو العشق (مقتطفات)

ملعون أبو العشق دام العشق دلّعها
لاصارت البنت تامرنا وتنهينا
تجزم على الراي والكلمه وتقطعها
وحنا الرياجيل لارحنا ولا جينا

*************************************

القصيده :لولا العقل (مقتطفات)

إستحيت ورحت بالخطوه وراي
يوم شفته من بعيد يكلّمك
والله إن لولا العقل توّه معاي
كنت أعرف أعلّمه وأعلّمك

[center]القصيده :غرام أحباب

على ذاك الطريق اللي يسمونه غرام أحباب
وطت رجلي على دربه ولاأدري وش نوى فيني

تبعته لآخر دروبه .. ألين أن القمر قد غاب
تعب قلبي ، ولا تعبت مسافاتٍ توديني

لقيت الليلة الجردا : هدب ظل وسما واعشاب
بعد ذاك الظلام اللي يتوهني عناويني

صدفتك معجبه فيني وياليت..الغرام : اعجاب
وتراك انتي الهنوف اللي هقيتك تستحقيني

عطيتك عشق من قلبي..وسلمت لغلاك رقاب
وغيرك يحترق قلبه ولا يقدر يحاكيني

أنا قبلك صدفت عيون لكن ويش جاب لجاب؟
ترى كل العيون اللي لقتني ما تكفيني

رماني حظي العاثر عليك وجيت لك طلاب
ولا أنتي اللي عشقتيني ولا انتي اللي عتقتيني

تعالي واعتقي ذاك الخفوق المولع المرتاب
مهب لاجلي ، عشان الله يجازيك ويجازيني

تعدي في سما عشقي ولو عشقي خراب أصحاب
وصوني بالهوى نفسك قبل لا انتي تصونيني

وشيليني على متنك : خفوقٍ باريٍ منصاب
ومن فوق الغرام العذب .. شيليني وحطيني

ولا منك هقيتيني شجاع وما يطيق يهاب
أنا لك بالهوى والله مثل ما انتي هقيتيني

أنا ما أمشي ورا غيرك ولو أنه يطق الباب
وترى عيبٍ عليّ أطعن..ولو كثرت سكاكيني

زهودٍ ما يطيق الدم لا داين ولا طلاب
شجاع وعارفٍ نفسي وأظن أنك تعرفيني

غيورٍ ماعرفت أضحك مع الغدر ببّرود أعصاب
أبيع عيوني الثنتين قبل أنك تخونيني

إذا شد الغرام .. اترك خفوقي : بين ناب وناب
لفرقى تكسر ضلوعي .. ولا عشقٍ يوطّيني

أنا رجلٍ ولي غيره .. وإذا شفت الهوى كذاب
تثور بقلبي الفزعه ولا تهدى شياطيني

سؤالك لو يزعزع بي كياني ما قبلت عتاب
اجي لك وأسالك نفس السؤال اللي سألتيني

عن العشق القديم أبواب .. تقفيها كثير أبواب
بعد ذاك الحبيب اللي خدعني وانخدع فيني

أبي عشق تحسب له كل نظرات العيون حساب
وابي قلبٍ علي قلبي ، وابى دينٍ على ديني

وابي نظرة عطا توفي ولا تخلف بدون أسباب
وابي منك قبل لا نتي تصديني .. توديني

وابي دربٍ على العذال صعبٍ ومتعبٍ وغلاب
وابي نفس الطريق الصعب يبعدهم ويدنيني

ترى لو للقلوب عيون ولدموع العيون أهداب
حشى ما تنزل الدمعه لغيرك لو تركتيني

أنا أول من عرف قدرك وأنا توي صغير وشاب
وابي منك ما دام أنك عرفتيني تحبيني

ما دام أني لقيتك في طريق أسمه غرام أحباب
دخيل الله ، وبعد الله دخيلك .. لا تخليني

ما دام أن كل من يحيا على وجه التراب تراب
عسى تنساني الدنيا مادام أنتي ذكرتيني

[/center]

القصيده :رد السؤال

انتبهت لدمعها بالهدب والكحل سال
لين جفت عينها دمع والقاع ارتوى

وابتدت لحضة جفا ونتهت لحضة وصال
وأنطفى نور السعادة واحسب انه ضوى

ما اكتفيت من الهوى والغرام أربع ليال
واقفت أيام التلاقي وجا وقت النوى

كنت ابلسى وابتسم والتفت عنها شمال
لا قويت الصد عنها ولا قلبي قوى

ما هقيت ان الهوى عذب قلوب الرجال
لين ضاع القلب مني وتفكيري سوى

رحت أدور دفوة الشمس ضيعت الضلال
جيت اطفي شعلة النار والقلب انكوى

ماهقيت ان السعادة خيال في خيال
تروى قلوب الحبايب وقلبي ما روى

كنت ابشتال الهوى والهوى ثقل الجبال
وان تحملت الجبل ما تحملت الهوى

كنت ابسلى بالهوى والهوى صعب المنال
ما رضا لي حظي اللي طواني وانطوى

قلت لا فراحي تعالي ولا قالت تعال
والخفوق ان قلت ابقبل على صدي نوى

الله أكبر لا شرقت شمس يتلاها زوال
كيف ابفرح في صباح مع الليال استوى؟

لاحصل بالحب قسمة ولا جا لي مجال
غير اشوف معاند الجرح وعناد الدوى

شبت النيران واقفت وجاء رد السؤال
ما تشب النار يا كود يوصلها هوى

القصيده :من تحت لتحت

لو تعرف الخطايا كيف كنت محروم
كان سود الليالي يوم طحت سمحت
لو هموم المفارق مثل كل الهموم
ماتشوفون عيني بالدموع سبحت
ولو تحن المشاكل عقب حب الخشوم
كان حبيت خشم المشكله واستحت
بين صدة عزيز وكبرياء مهزوم
عين شحت على وعينٍ استسمحت
بس مالله خلقني من بكاي معصوم
وادري انه المحاجر لو تفيض افضحت
والله اني على جرحي صبور وكتوم
لكن ان الدموع ان روحت روحت
اعذلتني ظروفي وانهكتني عزوم
والوجيه احزنت لي والقلوب افرحت
اشهد ان الليالي ماتعرف السلوم
قلب جافي لقاه ووجه صافي بحت
راهنتني تبلل بالدموع الكموم
ويشهد الله عليها راهنت واربحت
احرمت نور عيني من غلا ريم قوم
بذرةٍ وارتوتني واثمرت واطرحت
جادلٍ دوم ماهي مثلها كل يوم
استضاحت غموض وبالغموض اوضحت
دورت بين قلبي والهدب درب نوم
وامرحت وين مدري المهم امرحت
تنحت اسمي بقلبٍ جيت فيه معزوم
واسمها بين جلدي والعظام انحت
مثل جفني لعيني بالنعاس محكوم
كل مانمت نامت كل ماصحى صحت
ماتعارض كلامي غير عند اللزوم
بس لا قمت اسولف واندمجت سرحت
دايم ازعل عليها بس قلبي رحوم
وهي تموت بعذابي من تحت لي تحت
مثل وجه العلاقه في ثياب الخصوم
ان تطيبت طابت وان جرحت اجرحت
خصها الله بوصفٍ من خيال معدوم
لا اذان اسمعتبه ولاعيون المحت
كن ربي خلقها من بياض الغيوم
ومن كفوف السحابه بالورد القحت
عن سواها فرقها بالقمر والنجوم
وكل عذرى تباها بالجمال انزحت
بالحلا هي كوم وباقي الناس كوم
كفتٍ عادلوها بالبشر وارجحت
حسبي الله على اللي مابغاها تدوم
من بعد كيف كانت شوف كيف اصبحت
لاتحقق وصال ولا فراق محتوم
خطةٍ قربتني للفشل وانجحت
لعنة العشق تبقى مثل ضرب السهوم
لو محى الوقت جرحه صورته ما انمحت
كيف ابنسى وانا اللي من جفاف لسموم
ماحشمت العيون ولا الدموع فلحت
كانها بالحميا كل ربعي قروم
لو يلدون لاصعاب الظروف صلحت
اجزم ان كنت ياقلبي شجاع وجزوم
لد لعيون بنتٍ لا التفت الفحت
ماتهين البخيل الا يدين الخدوم
دام كف الخطايا بالجفا لوحت
نطح الباس باس ونطح اللوم لوم
وان تهدت تهد وصيح ان صيحت
ياتعيش بمعزه ياتموت محشوم
ودك ان الليالي لافعلت امدحت
عمر ضعف الاراده مايسر الرخوم
ضربت السيف لوبيدين الشجاع ذبحت

القصيده :قالها حامد

تماديتي وأنا مثلك تماديت بهجر وبعاد
وكلٍ مثّل عناده خفوقٍ ثابتٍ صامد
وإذا عندك بعادي عيد ترى عندي جفاك أعياد
وعسى طول الجفا مني يليّن قلبك الجامد
أبضحك وأظهر البسمة ولو إن الجروح اجداد
وترى قلب الحريقة ضو ولو وجه الحطب رامد
بكون أكبر من الغلطة وبعلن للهوا ميلاد
إذا كان الخطا منك مجرّد ثورة الخامد
وإذا كان الجفا منّك مسافات وغلا وعناد
تراي أكبر من عنادك وقولي قالها حامد

*********************************

القصيده :وش اللي يجبر الشاعر

انا والليل والعبرة وجرح وخاطر ٍمكسور
ونفس من هجير البعد والحرمان مقهورة وقلب ظامي لشوفك ولايروى ظماه بحور
وعين تحتري لحظة غياب الطيف وحظوره

ونار تنطفي مره ومره تشتعل وتثور
واقول النار مقدورة وهي ما هيب مقدورة

حسبت الليل بغيابك يمرن الليال دهور
وكني شايل بقلبي ليال الوقت وشهوره
تصبرت وتقدرت وبنيت من الخيال قصور
إلين ان الجفا شد الركايب وانتهى دوره

تحريتك على درب القصيد من ثلاث شهور
وحشا ما مات لك غصن يشف الماي بجذوره

تخيرت الغرام وجيت لا راضي ولا مجبور
وجيتي تسبقين خطاك مرضيه ومجبوره

وانا ما كان لي رغبه أبين واكشف المستور
ولكن الجمال أكبر من الخفاق وشعوره

جمال وود وعيون ودلال وكبرياء شعور
وفتنة تخذل عيون النهار وينطفي نوره

ولك في خافقي صوره تلاشت بين ضي ونور
وأخاف اسكت من الفرحة وتنطق باسمك الصورة

عرفتك وانتهت رحلة قساوة دربي المهجور
والا يا جملة أيام الجفا والصد مشكورة

خذتني للجفا عزه واخذني للعناد غرور
واخاف اكون بعنادى حبيب ومات بغروره

وإذا كانت مسافات الخيانة للغرام قبور
وش اللي يجبر العاشق يخون ويحفر قبوره؟

وش اللي يجبر الشاعر يدور للشعر جمهور؟
مدام انتي محبينه وعشاقه وجمهوره

القصيده :هموم بهموم

من يوم فرقانا الى يومنا اليوم
مافات يوم الا وهي مشغلتني
إليا غفيت اشوفها في حلا النوم
واليا صحيت بكل الافكار جتني
عشقتها من قلب ميس ومحروم
وتركتها يوم انها عاندتني
نار تشب بداخل القلب بسموم
حاولت اطفي ضوها واحرقتني
دنيا ثقيلة كلها هموم بهموم
كني حملت جبالها فوق متني

القصيده :رسالة رثاء

جيت اخاطب صرح واحكي من مناره

جيت اجدد جرح حزني واستثيره

جيت اقاسم دين الاسلام المراره

جيت اجرد حزن امه من جفيره

جيت اصفق للتواريخ بحرارة

جيت اوثق ذكريات الالف سيره

عن صروح وعن طموح وعن ادارة

عن قيادة عن ارادة عن بصيره

عن وجود الحب عن صدق الطهارة

عن حنان الاب وعن رحلة سفيره

عن منارة كل بيت وكل حاره

عن خسارة كل دار وكل ديرة

عن رجل يصعب على الشعر اختصاره

عن زعيم قل من تنجب نظيره

لأنه اول من ثبت حبه لداره

ولأنه اكثر من غمر هالارض خيره

ولأنه اقدم حب يجمعنا شعاره

ولأن دنيًا ما بها زايد مريره

كل دمعٍ ما يساق له بغزارة

والله انه ما يساق لموت غيره

من رحل سبع الجزيرة عن دياره

ضاقت الارض بعرب شبه الجزيرة

يا ذراعٍ رد للطهر اعتباره

يا رسالة رحلة الخير وبشيره

يا سبب مجد الإمارات وعماره

يا ذرا كل الشعوب المستجيرة

يا صدارة ما بعدها من صدارة

يا مسيرة ما تعدتها مسيرة

غيبتك ضيعة وفقدانك خسارة

والقلوب بلا جناحينك كسيرة

الوطن يبكيك ليله مع نهاره

والبشر تنعى جمايلك الغزيرة

يكفي انك كنت للأمة بشارة

يكفي انك سيد الحلم واميره

يكفي انك واحد لسابع اماره

يكفي انك ديره بمليون ديره

من حدودك بدل العالم مساره

من رعودك بلل التاريخ بيره

من سجودك اثبت الدين انتصاره

بعد جودك صابت الحكام غيره

يا ملاذ لكل من لاذ بفراره

يا مجير لكل من جوره يجيره

يا مرسخ كلمة العدل بجدارة

يا ميسرها وهي قبلك عسيره

يا حضارة في زمن ما به حضاره

يا ضمير لعالمٍ ميت ضميره

من يعوض الخير عن غيبة وقاره

من يلوم العرض في راعي الستيره

من يطفي في ضلوع الشعر ناره

من يشتت عن عقول الناس حيره

عشت مثل الحب لا يمكن دماره

كنت مثل المزن غيره تحت خيره

كنت مثل الطيب نفرح بانتشاره

كنت بالنسبة لنا حاجة كبيرة

انت نورٍ ترفض الأرض اندثاره

انت غيثٍ يروي الدنيا غديره

انت جارٍ يفزع ليا ضاق جاره

انت سيره مثلها ما فيه سيره

انت غاية انت رايه انت شاره

انت خوّه انت قوّه انت جيره

انت كل المدح ما ينقص عبارة

انت كل المجد ما تبقى مسيره

باختصار انت الذي صعب اختصاره

انت تاريخك من أولته لأخيره

جيت أقاسم حزن شعبك وانهياره

جيت أبستفزع قصيدي واستثيره

جيت لك ببكي على القبر بغزارة

جيت أجرد سيف حزني من جفيره

شاعرٍ يكسب من وقارك وقاره

ويعتبر مصير شعبك من مصيره

من قناعة حب شعبك وافتخاره

افتخاره عن قناعاتٍ كثيرة

انك اول من ثبت حبه لداره

وانك اكثر من غمر هالأرض خيره

وانك اول حب عاشته الاماره

وموتك اكبر حزن عاشته الجزيره

القصيده :مفارق الفرسان

سلها سيف القدر والقرم حول عن حصانه

عظم الله أجر كل الأوفياء المخلصين

من رحل نبض القلوب اللي غمر شعبه حنانه

ما بقى للناس نبض ولا قلوب ولا حنين

عيب ما احزن والوطن يدفن جسد من عز شانه

عيب ما احزن والحزن لمفارق الفرسان دين

كيف ما نحزن لسيف(ن) عز دين الله وصانه

كيف ما نحزن لدرع(ن) من دروع المسلمين

كاننا ما نحزن لجابر من بنحزن عشانه

العيون لو ما بكت لمفارقك تبكي لمين

إن رحل حاكم يجي مليون حاكم في مكانه

بس جابر اليا رحل يرجع لنا جابر منين

يا منجي عزة الشعب الكويتي من هوانه

يا مسجي فطرتك في نهج خير المرسلين

كل دمعه كفنتك وما بكت بعدك جبانه

كل عين(ن) ما شكت من غيبتك ما هي بعين

كان لك في كل درب احباب واصحاب وميانه

وكل لك في كل بيت انفاس واحساس وضنين

كنت صبح(ن) ما تعلمنا الفلاح الا عشانه

كنت صرح(ن) ما تزعزعك الرياح وما تلين

بانتصارك زادت امجاد العرب قدر ومكانه

من ديارك فاض خيرك للمخاليق اجمعين

مع قرارك ادرك التاريخ من يطلق عنانه

عقب نارك ولعت نار القهر بالطيبين

إسألوا دمع اليتامى عن محبته وحنانه

إسألوا التاريخ قبله كان وين وصار وين

إسألوا مجد الوطن عن عهد من وحّد كيانه

إسألوا حزن البشر عن قصة الخير الدفين

إسألوا عن طيبته.. عن هيبته.. عن عنفوانه

إسألوا عن فزعته في نصرة المستضعفين

كيف حاكم يسكن الدنيا ويعمل للديانه

يثبت إنّا خير أمه اخرجت للعالمين

وش تكون الحكمه إن ما جات من منطق لسانه

من هم الزهاد كانه ما هو من الزاهدين

وش يكون الاتزان بجنب عقله واتزانه

ويش هو الدين لو هذا الوَرَع ما هوب دين

لا الوطن كأنه وطن ولا جنانه هي جنانه

كل شي بالبلد يا شيخ مكسور وحزين

شعبك اللي عاش فيك وعشت له بأمنه وأمانه

النهار اللي جمع من وجهك الطاهر جبين

الرحيق اللي زرعته في كفوف الزعفرانه

والغرام اللي تركته في ضمايرنا سجين

والسماحه.. والمروه.. والحميه.. والفطانه

والكرامه والكرم واهل الوفا والمحسنين

باب قصرك.. مسجدك.. منبره مأذنته.. أذانه

المصلين.. الصلاة.. المؤمنات.. المؤمنين

كلهم من يوم ذاك القرم حول عن حصانه

والدموع تهلهم في كل وقت وكل حين

لي متى.. لين الشعوب تعرف فضله وامتنانه

لي متى.. لين السنين تروح من دون السنين

لي متى.. حتى نحس ان الفرح مثل الخيانه

لي متى.. حتى نزين حزن عمره ما يزين

لين ندفع بالمدامع حزن لا يمكن دفانه

لين نغسل بالجروح آلام كل المسلمين

لين نثبت كيف كان بحبنا سيد زمانه

وكيف لما مات جابر مات مرفوع الجبين

كاننا ما نحزن لجابر من بنحزن عشانه

العيون ان ما بكت لمفارقك تبكي لمين

الزعيم ليا رحل نلقى زعيم(ن) في مكانه

المصيبة ليا رحل جابر.. يجي جابر منين

القصيده :فراق الأكابـر

الله يعين العقل ويثبت الدين

في حزن لا منسي ولا هو بعابر

بصدورنا كأنه طعون السكاكين

وفعيوننا مثل الكفن والمقابر

حنا حزنا لشيوخ البعيدين

واشلون ما نحزن على الشيخ جابر

يا اكبر غلا تدمع على شانه العين

يا اعز من ناحة عليه المنابر

يا متعب بعطفك شموخ السلاطين

ومثبت بزهدك سمو المخابر

يا من خلقه الله وطن للمساكين

يا اصدق قصيد سيلته المحابر

رحت وتركت محبتك عندنا دين

علمتنا معنى فراق الاكابر

يا سيدي نلقى مثل طيبتك وين

وانت اللذي تكبر وغيرك يكابر

ان غاب جابرنا يجي جابر منين

واحنا ملاهيفك مثل ما انت خابر

حنا يبكينا فراق البعيدين

واشلون ما نبكي على موت جابر

القصيده :صوت الفلاح

البارحه يوم اكتمل صوت الفلاح بمرقبي

سبت الكويت بكبرها تبكي ورا ظهري وجيت

اسج رجلي للمسا والليل يسبيني سبي

وانا من البارح معاه اسري ولا كني سريت

ما ارتح لين اني قريت اهلا بكم في ابو ظبي

في ذمتي ما كني الا وسط بيتي في الكويت

لأني ليامني نويت اسعى لتحقيق طلبي

ما ينثني عزمي على قولة لعل ولا يا ليت

ما قد تعبت الا لناس(ن) يستحقون تعبي

ولا عنيت الا لظل(ن) يحتويني لا عنيت

نصيتها من عقب وجه الله لوجه اليعربي

اللي ليا مني تذكرته ليا ضقت اعتزيت

فلاح ابن زايد يزود وتقصر متون وعبي

الشيخه اللي من دخلت لقلب راعيها دريت

ان الرفيق اللي يجنب خوة امثالك غبي

وان الطريق لباب بيتك يختصر مليون بيت

وان البخيت اهو الذي ياصلك لو كان يحبي

وان الذي يتعب قبل لا ياصلك ما هو بخيت

وإنك وطن ما حس فيه اني مسير واجنبي

وإنك نهر شربت منه ومن بعدها ما ضميت

وجهك غناي وراحتك كنزي وخوتك ذهبي

اغضب من اللي يغضبك وارضى ليا منك رضيت

يا شيخ انا ماني ملاك ولا رسول ولا نبي

انا الجميل اللي حفظك وبحتفظ بك ما حييت

انا رفيقك لا غداك الحزن يا شوق الظبي

انا شريكك لو حزنك ولو فرحت ولو سليت

خذني ذراعك صاحبك درعك معك باللي تبي

درعك ذراعك صاحبك انا معك باللي بغيت

اللي يحمله منكبك كأنه يحمله منكبي

إليا سهرت اسهر معك واغفى ليامنّك غفيت

يا سيدي لو يمتثل وزن القصيد لمطلبي

لاكتب فلاح بكل حرف وكل شطر وكل بيت

اكتب فلاح بمشرقي واكتب فلاح بمغربي

اكتب فلاح ليا ذكرت وبكتبه لامن نسيت

فلاح في صدري.. فلاح بكل شبر بكوكبي

فلاح فيّ وفي عروقي من هنيا للكويت

لا هنت يا مخجل يدي يا عزوتي يا مكسبي

يا شعري ليامن كتبت وصوتي ليامن حكيت

من يوم ما اوحيت الندى يجتثني من مرقبي

سبت الكويت بكبرها تبكي ورا ظهري وجيت

ما ارتحت لين اني قريت اهلا بكم في ابو ظبي

في ذمتي ما كني الا وسط بيتي في الكويت

القصيده :المملكه عندنا غير

يا طير غرد وازهري يا نواوير
يا شمس طلي وانزحي يا غمامه
ويا نفس زفي للوجيه التباشير
ويا جفن كف من البكى والندامه
من هالدقيقه ما للأحزان تبرير
برجوع ابو خالد لنا بالسلامه
مادام سلطان الكرم حي وبخير
معاد ننشد لو تقوم القيامه
بشت يذري عن عجاج المعاصير
ووجه يرد ارواحنا بإبتسامه
وكف يجود بلا حدود ومعايير
وشهامة ما بعدها من شهامه
اكرم من اللي ماخذ الجود تبذير
واصدق من عتاب الخوي في خصامه
واشد من ظرب السيوف الشواطير
واجل من وصف يحدد مقامه
سلطان ياقرم يقود الطوابير
ياسيد الجيش السعودي وإمامه
ياشوق تلعات الرقاب الغنادير
يا منبر الدين الحنيف وحسامه
جيتك وفي صدري وطن من تعابير
وبخافقي حب الكويت وغرامه
لان الرفيق يحن ويحس ويغير
والصف الاوحد مستحيل انقسامه
شعب الكويت يكن لك كل تقدير
ويبلغ الشعب السعودي سلامه
ويعاهدك مهما تدور المقدير
نبقى لكم مثل الفشق في حزامه
لأن قدر المملكه عندنا غير
المحترم يفرض عليك احترامه
واللي يوفي بألتزامه مع الغير
عيب علينا ما نحفظ التزامه
ياجارنا اللي ما حصل منه تقصير
يا كبر دروع اهل الجزيره ظخامه
ارض الحرم .مهد الكرم.منبع الخير
طهر الظبا.ستر العبي واللثامه
يا قصة الكوثر ويا زمزم البير
ويا موقع اقدام الخليل ومقامه
اغلى ثرى تاطابه الرجل وتسير
واكثر عباد الله ورع واستقامه
ان كبروا هز الفضا صوت تكبير
ولسجودهم في ناصيتهم علامه
طول اللحا لوقارهم زود توقير
وقصر الثياب ابهم جمال ووسامه
اصحاب نهج ودينهم دين تذكير
وآمالهم تبني وطن من عدامه
لأن العمل يجمع شعوب وجماهير
عمر الجهل ما عز للدين قامه
ومن يدعي الاصلاح لأغراض تدمير
ماظن للرحمه صله بأهتمامه
الموعضه تيسير ماهيب تعزير
وحنا نميز بالحلال وحرامه
ما للهدف من قتل الاطفال تفسير
وصبر على فعل الجرايم غشامه
اكثر من اللي صار وشعاد بيصير
المسأله وصلت حدود الكرامه
مالله خلقنا في سمانا عصافير
والحمد لله مالنا بالرخامه
جهالنا عند المواجه مغاوير
وافعالنا صبر وثبات وجزامه
يوم الظعيف ببالشديده معيثير
حنا ليا ضاقت نطش العمامه
نفزع بوجه المدفع بسيف وبعير
ولا عاش فينا من يرد بكلامه
يامير ما يلحقكم الشك يامير
ولا غيركم يا اهل الزعامه زعامه
الله مدبر فيكم العدل تدبير
ومعكم يسود امن البلاد ونظامه
وإن كان للفتنه على الشعب تأثير
يمكن تزود وحدته والتحامه
الحكم حكم الله ولا فيه تغيير
ودوامكم ياسيدي من دوامه
والله لا عنتر ولا سالم الزير
يقدر يزعزع بأرض الاسلام هامه
دام الفهد طيب وابو متعب بخير
والنايب الثاني رجع بالسلامه
هلت على الشعب السعودي تباشير
وقامت على حزب الضلال القيامه

القصيده :الدعاء المستجاب

اشرق نهار ابوظبي واكتأبت بلاد الضباب
وابتلت ارياق الدعا شكر ونحيب ومعمعه

صحيح ما رد القضاء الا الدعاء المستجاب
ولا تهز المسلمين الا الظروف المفزعه

الله خلق للضيق باب وللفرج مليون باب
ينزل بلاءه لو يشاء ولو يشاء بيرفعه

ما يكتب لمؤمن ضرر الا وله اجر وثواب
ياشيخ ربك ما يضر المؤمن الا ينفعه

البارحه كشّر علي من الوله مليون ناب
واختر للدرب الشراع اللي هبوبك تدفعه

ولا دريت اني سريتك لين شدّدت الركاب
من الكويت ولا حللت الا على رحب وسعه

من لا حزم امتعه ولا اتنقالي ثياب
فزيت لا ماخذ ثياب ولا ذكرت الامتعه

دام الطريق لهامتك لوهو ذهاب بلا اياب
لأجل افرح بسلامتك ماقطع طريقك وارجعه

ياشيخ لو ان البكى يشفي من العلّه مصاب
ما ظل واحد بالجزيره ما تفجر مدمعه

من لا جزع من غيبتك ما عاد يجزع من غباب
ومن لا تزعزع من مصابك ماحدٍ بزعزعه

ان طحت طحنا كلنا وان طبت كل الشعب طاب
نفس المصير اللي جرعته كلبونا نجرعه

اللي يقاسمنا الضما بنقاسمه طرد السراب
واللي يحس بجوعنا لامن شبعنا ِنشبعه

الله خلقنا للظروف المفزعه خوّة ذياب
ولا تبان الخوّة إلا بالظروف المفزعه

لو يحصل (لزايد) مصاب نشاركه نفس المصاب
ما نتركه يدفع ثمن إلا نتسابق ندفعه

نغضب مدام انه غضب . ننهاب مادامه مهاب
نضر من ضره ونخدع من يحاول يخدعه

لأنه قريب لفرحنا نبقى لأحاسيسه قراب
امّا سكن بضلوعنا وإلا سكنّا بأضلعه

نحضر معاه اليا حضر ونغيب له مادام غاب
وإن قام قمنا كلنا وإن فز فزينا معه

إن ما اكتأبنا من غيابك.من يعرف الاكتآب
واذا الخليجي ما سمع صوتك اجل من يسمعه؟

ما شاب حبّك للعمل وانت بسواعدنا شباب
ياشيخ ماتفقد امل طاع الزمن وإلا طعه

خذنا رقابٍ من ذهب وإضرب ولا تحسب حساب
نفداك رد اللي ترده واقطع اللي تقطعه

وشلون يركبنا الخطى وبطاعتك عين الصواب ؟
كيف يتعداك العطى وانت إنخلقت بمنبعه

مخاطبك يا سيّدي ماهو بحيالله خطاب
ومثلي مهو بكل القصيد اللي بمدحك يقنعه

ماجيك وجه لوجه مابيني ولا بينك حجاب
إلا اجمع الك اللي يعجز الجن الازرق يجمعه

ماحب أوصّفك بشطر من غير ما اشقّق كتاب
ياشيخ انا ما ابدعت شي.اوصافك انت المبدعه

شوف الرجال وشوف نفسك.ويش جاب لويش جاب؟
هو فيه احد بالكون كله يصنع اللي تصنعه؟

شف وانت واحد بالبلد واسمك يعيش بكل شاب
وشلون اجل لوفيه مثلك بالامارات اربعه؟

لو ما انخلقت انسان.لايمكن تكون إلا سحاب
لأنك رفيع ولي عطيت الخير ما تسترجعه

يا ذخر لصعاب الحلول وفخر بحلول الصعاب
يامرجع شموخ المراجل يالشموخ بمرجعه

يادرع حكام العرب يا شوق تلعات الرقاب
يانافع الناس بزمانٍ قلّت إبه المنفعه

سلامتك كثر البكا اللي ينزف بدعوة مجاب
وسلامتك كثر الدعا اللي رحمة الله ترفعه

وسلامتك كثر الغلا وكثر الملا وكثر العتاب
وكثر الزهر وكثرالمطر وكثر الشجر وكثر أفرعه

وكثر اللي ما بعده عدد.ولا يوصّل له حساب
وكثر اللي ما اعرفه ولا اسمع فيه.ولا راح اسمعه

سلامتك منّيه الى آخر شبر فوق التراب
سلامتك منّك الى غرب الوجود لمطلعه

من يوم نوّرت الوطن وأكتأبت بلاد الضباب
ماجفّت حلوق الدعا شكر ونحيب ومعمعه

صحيح ما رد القضاء إلا الدعاء المستجاب
ولا تهز المسلمين إلا الظروف المفزعه

القصيده :فخر الامجاد

ياطيب شوف مروتك مع هل الطيب
كانك تبي تعرف اصول المروه

طالع فلاح وتقطع الشك والريب
خلك معه واللي يسويه سوه

إذا المراجل عندك تحظر وتغيب
تغيب عندك وتحظر مع سموه

هذاك ماتحسن به الظن وتخيب
راعي جميل وخوته غير خوه

اسلوب طيبه غير كل الاساليب
حموته ماهي مجرد حموه

فعله لحاله طلع براسي الشيب
بأسبوع جدد نظرتي للإخوه

تسمع سكوته تحسب ان الحكي عيب
تسمع كلامه ماتحسد المفوه

ان كانها بالمرجله والمواجيب
أعز من شبت على الارض ضوه

فلاح شوق المترفات الرعابيب
تفخر به امجاد العلا من علوه

واثق بخلانه ثقة عالم الغيب
ويوفي بميعاده ولو مع عدوه

النو يسرق من يديه التراحيب
ومكارمه تسرق من الغيث نوه

واغلا صفاته جابها بالتجاريب
وطهر سماته من سمات النبوه

ان جيت له بالطيب بيجيك بالطيب
ومن جاه بالقوه يجيله بقوه

اصلا حلاة الآدمي سهل وصعيب
مثل البحر يخفي غضبه بهدوه

مدح بغير عيال زايد عذاريب
الطيب نابع من حنان الابوه

ياطيب لو كثرو عليك المعازيب
واحترت بين مزبنين الجلوه

طالع فلاح ويطلع براسك الشيب
خلك معه واللي يسويه سوه

إذا المراجل عندك تحظر وتغيب
تغيب عندك وتحظر مع سموه

القصيده :كحيلان

يا شعر تبقى في نظرهم كحيلان

وبنظرتي تسوى عيال الحمايل

حنا الاثنين اخوان واكثر من اخوان

لو ما اجتمعنا بالنسب والسلايل

لو نختلف بأسماء وعروق وأوطان

يبقى التشابه بيننا بالخصايل

وانا ليا مني نويت أكسب إنسان

أسعى له بكل السبل والوسايل

أعرف كيف ارد الاحسان باحسان

وكيف احصد بذور الفضايل فضايل

عايش زمن عاصرت به كل الازمان

ما اعيل بس انطح ثمانين عايل

اكسب عدو واحرق به قلوب عدوان

اشعل فتيله بس أطفي فتايل

إن خفت ضعف أخاف من ضعف الإيمان

وإن عفت حمل أعاف حمل الجمايل

ما أضمى على الساحل ولو مت غرقان

لو مركبي تابوت والموج هايل

أغرق شهيد أرحم من أموت عطشان

طيحة شموخ ولا وقوف متمايل

ودك ليامن جيت في كل ميدان

لو ما انت الاول بالصفوف الأوايل

خلك ليا عودت خسران خسران

ينقال عنك عامل(ن) لك عمايل

لا صرت تحلم احلم تكون سلطان

وان جيت تقنع اقنع بحلم زايل

الوقت غربة وآخر الدرب عنوان

والعمر رحله والتجارب رحايل

وانا كثر مالي من الناس خلان

اللي صفولي بالشدايد قلايل

شايف حسد.. قل شايف اشكال والوان

قابلت ظلم.. الا لقيت الهوايل

وإن عشعش بصدري من الغبن شيطان

وتسددت دوني جميع الوسايل

بلقى من عيال الحمايل كحيلان

اللي يكفي عن عيال الحمايل

مرات ربك يرزقك خوة إنسان

واحد ويسوى في عيونك قبايل

القصيده :قصة حياة

جتني ظروف للكدر مستعده
قامت تحدد لي الاحزان ميعاد
مرة مع حظي ومرات ضده
واليا تكدر خاطر القلب تزداد
في دنية خلقت على الناس نده
مردودها للخير تجرح واجهاد
إتجي على المظلوم وتبيح سده
واتجي على الظالم تساهيل وامداد
والصدق فيها ما لقى من يعده
والكذب يلقى له مع الناس شهاد
واللي فقد حق عجز يسترده
يصبح على تسديدة الدين معتاد
ومسكين من راد الزمن يستبده
عيت عليه اقدار الايام تنقاد
تطرح به الدنيا على القاع مده
مثل الفريسة والمقادير صياد
ضاعت حياته في لحاف ومخده
عدت عليه ايام بغفول ورقاد
وماله عن دروب الوعر من يصده
ولا هو عن دروب السلامات نشاد
تلطمه مو جات القدر فوق خده
وتخطي به الخطوة من بلاد لبلاد
حبله قريب وعاجز لا يشده
يحسب جميع الناس قاصين وبعاد
عاند حياته لو حياته تحده
وادى سنينه كلها عناد بعناد
إصحى من الغفلة ترى العمر حده
للوقت سجاته وللموت ميعاد
وهذي هي الدنيا تجي مستجده
تلقا بها المازح وتلقا بها الجاد
قصة حياة ومننا مستمدة
ويلزمها تنفيذ وإخراج وإعداد
عشنا على كف القدر فوق يده
الله خلقنا عباد ونفني له عباد
ولا حاصل للحي ماكان وده
ولا حاصل للي يموتون ميلاد
ويكفيني اني من ظلوه الموده
ومالي مع الخسران بالدين مقعاد
وإن جتني الغفلة علي اوقات شدة
اصبح لها صداد والقلب صداد
وتقدير ربي مالنا في مرده
ومعارض لتقديره إشراك والحاد

القصيده :أثني عشر شهر

التحدي والتصدي عادة القلب الصبور
والصمود اقرب مسافة لكن الفترة دهر
والخساير عاندتني حوطتني بلف سور
والخيانه للامانه زودت قلبي قهر
كنت ابقدم للنهاية لكن الدنيا تدور
وقفت وياي ليلة وكتمل ضدي شهر
كل ماطلت الحقيقة وامتلا قلبي سرور
طاولتني من عذولي طعنة وسط الظهر
حرت اميز في دروبي بين نار وبين نور
بين هجعة ليل ولا صحوة اجفان وسهر
خانت ظنوني وعيوني خانني ذاك الشعور
اقطف الشوكة بكفي واحسب الشوكة زهر
مشتهر بلسان صادق ماحكيت الصدق زور
ولا حكي عني لساني ولا جهرت ولا جهر
كم كتمت السد وافي خايف اعصابي تثور
لين باح السد لما مدمعي بان وظهر
ولا طوت رجلي مسافة ولا اثر فيني شهور
ولا كوت قلبي حريقة ولا طفلي ضوى نهر
معتري درب النهاية بعبر ضفاف البحور
واشبك الدنيا بكفي وادفع ايامي مهر
ودام هذا عنفواني واضح بين السطور
من يلوم الدرب فيني لو قهرته او انقهر
وبتدى مرة جديدة ودام انا قلبي جسور
تجربة والعمر مرة والسنة اثنا عشر شهر

***********************************

القصيده :أفة العصر

إبتدا للشعر مبدا وانجلا ليل وضباب
وانصتت لاجلي مسامع وانظرت فيني عيون
وانتخت في القصايد من على صدر الكتاب
واعتزي بالشعر شاعر والخلايق يسمعون
وما بديت الا بمثل للسؤال وللجواب
واسألوني من بعدها لو بغيتوا تسألون
بطرق ابواب القضية كلبوها باب باب
واعرض اسباب الحقايق وانتم اللي تحكمون
من تحررنا وحنا عايشين في سراب
إنجرفنا مع متاهات الهتايف واللحون
وانسجمنا بالسعادة في عيون الاكتئاب
ومانبالي في مصير الكارثة حتى تكون
آفة الإدمان شاعت في بلدنا بالخراب
واستقرت في جسدنا مثل ما انتم تعرفون
حطمت كلمة عزيمة داخل قلوب الشباب
وزعزعت مبدا الشجاعة والقناعه والظنون
عاندت قلب البطولة في مرونة وانسياب
بدلت عقل التطور بالسفاهة والجنون
حاربتهم حرب ظالم من ورا سترة حجاب
واغرقتهم من ديون في ديون في ديون
لو دعت قلب الهونة هام فيها واستجاب
كنهم يوم استجابوا يدركون ويشكرون
مايبالون بخطاها من وراها ويش جاب
اولتها يلعبون وتاليتها يتعبون
إرشدوهم للسلام وللطريق وللصواب
ذكروهم في خطاهم يا عساهم يذكرون
آفة حطت عليهم ياعساها للذهاب
إبتلوا فيها وعاشوا من عناها يشتكون
من سبايبها فقدنا كم بنت وكم شاب
وكم هنا وكم لنا بيد ناس يجرحون
ليش نبقي تحت ذلة ورحمة انياب الذياب
نظحك بوجة الاعادي وآخرتها يضحكون
ننظر الشر بنواظر يأسنا ونقول غاب
ننتظر كلمة عساهم يصلحون ويفلحون
يستبدون ببلدنا ما يخافون العقاب
وان تجاهلنا تمادوا وان حكينا يزعلون
شجرة الزقوم تبقى لجلهم يوم الحساب
شجرة تشوي القلوب وتمتلي منها البطون
وارتكاب الذنب وسهوا عكس عمد الارتكاب
ومن يطيحون بخطاها عمد حتما يندمون
وانت ياللي تمتحنا بالخفية والغياب
يوم تاجرت بسمومك في وطنا من تكون؟
من يجيب لنا المخدر خايب والسم خاب
وكل ناسي يتبعونه بالتجارة يخسرون
نحظر التاجر وسمه من تحت قاع التراب
ونجعلة عبرة لمن لايعتبر وسط السجون
للسما عز وثبات وللسحاب الانسحاب
والرفيع يدوم عالي والوطن والدون دون
وياوزير الداخلية يارفيع للجناب
لاتهون وجعل كل من يستمع لي مايهون
قدها ولك البطولة وانت كفو للثواب
ومايزعزع كبرياء محمد الخالد حصون
واصل دروب المسيرة والبس لنصرك ثياب
دامنا عشنا نصون ترابنا لامانخون
ومانفرط بالكويت ولو على قطع الرقاب
والأعادي لاتعزووا يعتزون ويعجزون
ومن يعيشون بثراها مايشوفون العذاب
ولا حصل خوف عليهم بل ولاهم يحزنون
في ظلال الشيخ جابر حكمنا بالعدل طاب
قادنا وحد هدفنا والخلايق يهتدون
الزعيم اللي يهيب المعتدين ولايهاب
من سلايل حكم ناس ويحكمون وينصفون
وانتهى شرح القصيده وسط مضمون الخطاب
وان خطيت بشي فأنتم خير من هم يعذرون
وهذي ابواب القضية كلبوها باب باب
قلت انا كل الحقايق وانتم اللي تحكمون

» ديوان الشاعر سعد علوش ,
» ديوان الشاعر الامير بدر بن عبدالمحسن
» ديوان الشاعر خالد المريخي
» ديوان الشاعر ناصر الفراعنه
» ديوان الامير الشاعر خالد الفيصل