ديوان الامير الشاعر خالد الفيصل

بسم الله الرحمن الرحيم ,,,
المعروف بـخالد الفيصل، أمير منطقة مكة المكرمة في المملكة العربية السعودية. من مواليد مدينة مكة المكرمة.

وهو نجل الملك فيصل بن عبد العزيز ثالث ملوك المملكة العربية السعودية. عمل في رعاية الشباب بوزارة الشؤون الاجتماعية وإليه تعزى فكرة إقامة بطولة كأس الخليج لكرة القدم. ثم عين أميراً لمنطقة عسير عام 1971. وفي 16 مايو 2007 عين أميراً على منطقة مكة المكرمة، التي تشمل أيضاً مدينة جدة و مدينة الطائف.

مكة

خالد الفيصل بن عبدالعزيز آل سعود الأمير الـ 271 لمكة المكرمة منذ فتحها رسول الله محمد عليه أفضل الصلوات وأزكى التسليم وهو الأمير السعودي الثامن لمكة المكرمة.. حيث كان والده الملك فيصل بن عبدالعزيز أول أمير لها في عهد والده الملك عبدالعزيز .. والفاصل الزمني بين امارة الأب «فيصل» و الأبن «خالد» 84 عاماً.. ومن المصادفات أن يكون «خالد» هو الأمير الوحيد من أمراء مكة المكرمة المولود فيها.

تعليمه

تلقى تعليمه العام بمدرسة الطائف النموذجية، وواصل بعدها دراسته الجامعية في جامعة أكسفورد بالمملكة المتحدة وحصل على درجة البكالوريوس في الاقتصاد السياسي.

أدبه

يعرف عن الأمير خالد الفيصل أنه شاعر وأديب وفنان، ويعد من رموز الشعر النبطي بالمملكة العربية السعودية. بدأ بنشر شعره تحت لقب (دايم السيف). أصدر عدداً من الدواوين الشعرية منها (حرف ولون) وأقام عدداً من الأمسيات الشعرية في مدن عربية وعالمية كما أقام معارض فنية من أهمها المعرض المشترك الذي أقامه مع الأمير تشارلز ولي العهد البريطاني ضمن مبادرة عرفت بمبادرة (رسم ورعاية) انطلقت عام 1999.

متفرقات

- يرأس الأمير خالد مؤسسة الفكر العربي والتي تعد أحد المؤسسات الفكرية الأهلية التي تدعو إلى النهضة والتضامن العربي وتهتم بالشأن العربي، وقد دعا إلى تأسيسها في يونيو 2001، واختيرت بيروت مقراً لها.

- يدير الأمير خالد مؤسسة الملك فيصل الخيرية التي تحتضن جائزة الملك فيصل العالمية وعدداً من المراكز البحثية والمعاهد التعليمية وهي المؤسسة المالكة لبرج الفيصلية أول ناطحة سحاب في المملكة العربية السعودية.

- الأمير خالد متزوج من الأميرة العنود بنت عبد الله بن محمد آل سعود وله من الأبناء: بندر، سلطان، سعود ولؤلؤة (توفيت في الثالثة من عمرها).[

*****************************
أول قصيده

أجاذبك الهوى

اجاذبك الهوى و أطرب و أغنّّي
و أبادلك الغـرام بكـلّ فنّـي
و اشاهد صنعة الله في جمالـك
و حكم الـذي فيـك امتحنّـي
و أشوف الودّ فعيونك و لاكـن
يرد الودّ خـوفٍ فيـك منّـي
ولا أدري وش يخيفك يا حبيبي
و أنا بك مغرمٍ جـاك متعنّـي
ولو أنك تلاحظ شفـت عينـي
و هي تروي حديث الحبّ عنّي
تنعّـم دام تـوّك فـي شبابـك
ليالي العمر مـا قـطّ أمهلنّـي
تعال أسقيك من جدول غرامـي
شـرابٍ فيـه للعاشـق تهنّـي
و اهيم بكل سمـاوات المحبّـه
الين أنـك بعـد مثلـي تغنّـي

أستكثرك

أستكثرك وقتي على وغدا بك
عادة زماني كل ما طاب هون
ليت الذي وداك يزين جابك
تشوف عقبك كيف الأيام سون
شرق مشيت وغرب وقتي مشابك
والقلب ماله لئيم فيك لون
عقب إلهنا بك ذاق لوعه عذابك
تلـونت دنيـاه ولا تلـون
طويتني طي الورق في كتابك
حتى مغاليق الحش لق تطوون
اشتقت لأيام الهوى في جانبك
يوم الشموع بليل الأحباب ضوت
واشتقت أقول لهاتفك مرحبا بك
واشتقت لغيوم الصحارى تكون
عوا ترى داع الهوى عند بابك
وأروى القلوب الى بعد ماترون
غنيت لك عمري ولاجا جوابك
واسمي مع مجنون ليلى تذون

************************

اللي تودّه

إلى منه جفاك اللي تودّه
ولا تدري وش الّلي عنك صدّه
تجرّع مالح التعبرات واصبر
ترى كثر الشكاوى ما تردّه
وإلى من الّليالي عوّدت بـه
تغانم كل فايت واستردّه
حذار تنشغل بعتاب خلّك
ترى كثر العتب يمحي المودّه
ليالي العمر لحظاتِ قصيرة
ومـا ودّعت منها لا تعدّه
تنهَض مثل صقرِ مد شوفه
غداة الصبح روحه مستهدّه
وإذا حوّل على جول الحباري
تولَّى خربها وإن طار ردّه
ترى الرجَال يثبت للشّدايد
إذا ما هدّها وإلاّ تهدّه

المعاناة

ياليل خبرني على أمر المعاناة
هي من صميم الذات ولا أجنبيه
هي هاجس يسهر عيوني ولا بات
أو خفقه تجمح بقلبي عصيه
أوصرخه تمردت فوق الاصوات
أو ونة وسط الظماير خفيه
أوعبرة تعلقت بين نظرات
أو الدموع الى تسابق هميه
أعانى الساعه وأعانى مسافات
وأعانى رياح الزمان العتيه
وأصور معاناتى حروف وابيات
يلقى بها راعي الولع جاذبيه
ولاني بندمان على كل ما فات
أخذت من حلو الزمان ورديه
هذي حياتي عشتها كيف ماجات
آخذ من أيامي وأرد العطيه

*********************************

الونّه

اونّ وريـاح الليـالـي تـونّـي
و البرد في جوفٍ كما الغار خاوي
ما كنّ لي عقـلٍ ولا قلـب كنّـي
جذعٍ وقف في وجه الأيـام ذاوي
وبي عبـرةٍ محبوسـةٍ تمتحنّي
في عيني وْحلقي و صدي شكاوي
وبي من قديم الوقت جرحٍ مكنّـي
وبي من جديد أيام وقتي مكاوي
ان قلت زانت خالف الوقت ظنّـي
و أن قلت هانت عاجلتني بـلاوي
اجـامـل ايــام ولا جاملـنّـي
هامت بي الدنيا هيـام الخـلاوي
و الوقت جاير و الليالي أسهرنّـي
و الحزن ما بين الضلوع مْتلاوي
أون وكـلٍ يحسـب أنّـي أغنّـي
عليل و كلٍ يحسب أنّـي مـداوي

بنات الريح

من بنات الريح لي صفرا جفول
كنها ظبي الفلا بجفالها
منوة الخيال عساف الخيول
زينها في دقها وجلالها
زينها ما شفت وصفه بالمثول
الله اللي بالجمال اصخى لها
تستذير كحيلتى من كل زول
ما يصخرها سوى خيالها
اذكر الله كل ما قامت تجول
واحمد الله خصنى بحبالها
كنها تمشي على قرع الطبول
فتنى اللي خافقه يبرى لها
ظافي القصه على الطرف الخجول
تنكسر شمس العصر بظلالها
وصفها وصف السحاب اللي يحول
كل عين تستخيل خيالها
او كما طاري على الخاطر عجول
صاحبه حقيقته ما طالها
كل رجل في حياته له ميول
والهوايه تمتلك رجالها

******************************

بنت الكحيلة

بنت الكحيله مهــرتي
وخيالتي من كل اصيل
ألقى عليها طربتي
بين المعنـق والشليل
صدر وقطاة فلوتي
العنـق والسـاق الطويـل
وقع الحوافر نغمتي
وحـداتنا رجع الصهيل
أبوي وجدي قدوتي
لو ما لهـم عندي مثيل
بالدين تفخر عزوتي
والرمح والسيف الصقيل
ماكر حرار ديرتي
ما في هل العوجا ذليل

تدلل علينا

تدلل علينا ياسمـي الظبـي وش عـاد
تدلل ولك بامر الهوى شافـع عنـدي
ولك في خيال الشاعر المهتـوي ميعـاد
ومجلس على غيمة وليلة قمر نجـدي
اسافر معك لبلاد وانزل معك في بـلاد
ومن غيمـة لغيمـة ولا للسمـا حـد،
رسمتك ضحوك الفجر يافرحة الاعيـاد
ولمعة شعاع ينغمس فـي نـدى ورد
وغنيت بك صوت لقلب الهـوى ميـلاد
ونغمة غرام ذاب في لحنهـا وجـدي
اشوفك مطر هتان لا بـرق لا رعـاد
من الوسم يبعث بالصحاري زهر ودي
احبك وصل وبعاد احبك رضا وعنـاد
ولايختلف وعدي ولاينتقض عهـدي

*******************************

حدر القمر

حدر القمر صوّت لخله وناداه
ثلاث مرات وبالرابعة ون
حدر القمر يا ما همس له وناجاه
وعيونهم ياما بنوره تلاقن
والبارحه عدا على الذيب بعواه
واقفت ظنونه بالليال يتعادن
مرٍ حوالينه ومرٍ تعداه
ومر تضاحك له ومر يتباكن
هذي سواة اللي عن النوم قزاه
طيف الحبيب اللي على خاطره عن
ان شافت عيونه جمال تمناه
وان صوت القمري لصوت الهوى حن
الجارحه تجرح وتسري وتنساه
وجروح مجروح الليالي تساقن
والخافيه طعنة زمانه تمثناه
والبينه عنها عيونه يبوحن

حنا العرب

حنا العرب يــا مدعين العروبة
وحنا هل التوحيد وانتم له اجناب
وحنا شروق المجد وانتم غروبه
وحنا هل التاريخ و أنتم به أغراب
يوم الفقر شلتوا علينا عيوبه
واليوم عقب النفط جيتوا لنا أنساب
ويوم الفقر فينا البداوة سبوبة
واليوم صرتوا مثلنا بدو واعراب
لو الهوى منكم منعتم هبوبه
لا شك رزاق الملا رب الأرباب
و لو المطرمنكم منعتم صبوبه
لا شك رزق الخلق من عند وهاب
جيش الحسد سقتوا علينا حروبه
كل يبي يزرع على جسمنا ناب
حرب على المحسن تراها عقوبة
بالله عساكم ما تفيدون حراب
ياما عطينا ما ندور مثوبه
الا من اللى من ترجاه ما خاب
و ياما نصرنا صاحب ضيقوا به
عاداتنا نقدم الى ما لردى هاب
و ياما نصانا من تعثر دروبه
يدخل حمانا من تعذرها الأصحاب
حنا بنينا دارنا من طيوبه
وانتم سلبتوا داركم كل ما طاب
الله سقانا من بحرنا عذوبه
وانهاركم مثل البحر هدر تنساب
حنا زرعنا الحب بارض خصوبه
وأنتم زرعتوا كره الأجيال بتراب
وحنا دعينا السلم نوبه ونوبه
وانتم حمام السلم بعتوه بغراب
يا من دعا للحرب ما ادراك خطوبه
لا تحسب أن الحرب تهديد وخطاب
من شب نار الحرب يصلى شبوبه
ومن ثور الفتنة تعرض للأسباب
ما يستر الرجال ملبوس ثوبه
الدين وافعال الكرامة له ثياب

خذاك الزمن منّي

خـذاك الـزمن منــي
وترك لي أشواقي
ليته خذا ذكراك من كل أوراقي
السهر ولا حياتي ليتها دمعة قهر
تذكر أيام القمر كيف السهر أصبح سهر
كيف الأماني اصبحت شكوى عمر
ليه انطفى فيك الزمان
ليه اختفى فيك الأمان
خذاك الزمن مني
يا روعة الماضي ولوعة حاضري
يا بهجة الخافق ومتعة ناظري
تذكر الحب الأمل قبل يصبح
ذكــريــات
تذكر الفرحة ولهفاتي عليك
أسبق الموعد عليك
لحظة الشوق الكبير
والخفوق اللي من اللهفة يطير
ورقصات الدقايق عند الوعد
وهمسات الحقايق قبل الوعد
ليه انطفى فيك الزمان
ليه اختفى فيك الأمان
الله على وقت مضى
فيه الرضى
فيه العيون اللي تعانق أحباب العيون
فيه الخليل اللي على خله يمون
حتى الظنون ما تختفي
فيه الهوى نشوان
فيه ابتسامات الزمان
أحكي الهوى واشكي النوى
وأساهر القلب الأليم
بعد الهنى
بعد ما كنا سوى
لايمي الحب العظيم
ليه انطفى فيك الزمان
ليه اختفى فيك الأمان

دستور

دستور يالساحل الغربـي
فلّيت في بحرك شراعـي
ياموج هوّن علـى قلبـي
داعيه من شطّكـم داعـي
اللي لهـا مبسـمٍ عذبـي
رعبوب و عيونها وساعي
مملوحـه زادهـا ربّـي
لفتة ظبي يـوم يرتاعـي
لو ما تهيّت على دربـي
لقتنـي بدربهـا ساعـي
حنّيتها من حمـل ذنبـي
لى مت وعيونها تراعي

********************************

سمرت

سمرت بصحبة حروف القوافي
احملها تناهيت خوافي
اشكل بالحروف الوان صوره
احركها من المعنى بصافي
اشيل الحرف من معنى لمعنى
واجاري ما زهر واظهر بخافي
والى منى عطيت الحرف ونه
بها حرفي على النجمات طافي
يقوم كل نجم من منامه
أنا ما نيب اسامر نجم غافي
يجيني كل نجم منه معنى
ولا قد قلت للنجمات كافي
تصور لي دموع وابتسامه
من عيون تقصوت ما تشاف
ألا يا نجم يا عالي تبصر
شف بعين المحبه عين وافي
وخبرني عن علومه وحاله
عسى قلبه مع الأشواق دافي
ولو ممشاي في جمر يفيده
مشيت بجمرها كنه عوافي
ولكن وش يفيده لو ذبحني
ومن يوصف جماله عقب قافي

ساعة العيد

يا ساعة الفرحه تشوقت للعيد
عيد العيون وعيد قلب الصبابه
رد الجمال لشوفتي يا اتلع الجيد
واسحب على حرفي لحون الربابه
حرفي بصوتك يا اجمل الصوت تغريد
يا رمز حبي هاك رمز الكتابه
يا صبح عمر فيك للعمر تجديد
وحبك يجدد كل يوم شبابه
للعين والقمرا وحسنك مواعيد
وليل الهوى شرع للأحباب بابه
ياما زعجت الصوت باسمك تراديد
وياما نسيم الوجد يمك سرابه
وياما تمنيتك على باقي الغيد
واقول مثلك يا غلا الروح ما به
ابيك تهوى مثل ما اهواك وتزيد
يا من خفوق القلب حسنك غدا به
يا قطرة الغيمه على يابس البيد
رد الحياة لخافقي يا ذهابه

***********************************

سريت

سريت ليل الهوى لين انبلج نوره
امشي على الجدي وتسامرني القمرا
طعس وغدير وقمر ونجوم منثوره
انفاس نجد بها جرح الدهر يبرا
يا نجد الاحباب لك حدر القمر صوره
طفلة هلال وبنت اربع عشر بدرا
حبيبتي نجد عيني فيك معذوره
معشوقة القلب فيها للنظر سحرا
فضة شعاع القمر في نجد مسحوره
منشاف لمع قمر في خدة سمرا

طال السفر

طــال السفـــر
والمنتظر مل صبره
والشوق با محبوب في ناظري شاب
رد النظر
خليت بالكف جمره
سعيرها في داخل القلب شباب
عز الخبر
والمهتوي ضاق صدره
يا من يرد العلم عن هاك الأحباب
طيفه عبر
ما أرسل مع الطيف عذره
هو خاطره من لوعتي ما بعد طاب
هو ما ذكر
أن الجفا فيه كسره
للخافق اللي من هوى صاحبه ذاب
يا ما سهر
طرفي على حبس عبره
اردها والوجد للدمع جذاب
دمعٍ حدر
جاله على المنع جسره
عظيم وجدي للدمع شرع الباب
يوم وشهر
عزاه والعمر مره
والناس واجد لكن الولف غلاب

في سحــــــــابه

في سحابه ..
على متن التمني
شفت عمري
خيال في سحابه
يا ذهابه ..
تعدى ما ارجهن
كن عامه
نهار يا ذهابه ..
من غدا به
ربيع العمر مني
حسبي الله
على وقت غدا به ..
إلتوى به
رجا قلب يون
ويل قلب تعلق والتوى به
في شبابه ..
حبس نشواه عني
ما تهيا لذيذه في شبابه
ذا صوابه
عقب ما هو طعني ..
لو نسيته يذكرني صوابه
من هقابه ..
يخيب كل ظني
واعذاب الخفوق اللي هقابه
رد بابه ..
زماني وامتحني
يوم ثور عجاجه
رد بابه
يا ربابه ..
على المسحوب غني
من قصيدي
بكى قوس الربابه

في غير الزمــــان

في غير الزمــــان
في نفس المكان
مرتني الذكرى و انا واقف
في نفس المكان
في غير الزمان
ياما ياما ضحكت أيام لكني بكيت
ياما ياما حلمت أحلام لكني صحيت
منها ابتديت و فيها انتهيت
الا من الذكرى
قالت لي الذكرى كلام عني ... والله بغيت انساه
و صاحت ربابة شوق و اثر النغم مني
يشكي و أنا شكواه
و غنى صوت في لحظة فرح
و هلت عين و قلبي انجرح
في عينها نظرة عتب
و بصوتها جرح و تعب
و شفت ابتسامة عليها هلت الدمعة
و نظرة ملامة من الماضي على ربعه
و انا مع الذكرى
في نفس المكان في غير الزمان
تعطيني الذكرى و لا تاخذ أبد
تحكيلي الذكرى و لا تسمع لاحد
و انا عندي كلام ممنوع حتى عن الخاطر
لا ياخذه أمسي و لا يقبله باكر
مقدر أوضح غايب الصورة
و لا أزود للمسا نوره
الله الله يا ذكرى
الله يا ذكرى ياما فهمتيني خطأ
ياما قدم رجلك على جمرك خطا
و اليوم هيضني هواي
أمشي و لا ادري وش بلاي
هو من شقاي اللي مضى و الا هناي
و انا مع الذكرى
في نفس المكان
في غير الزمان

في غربتي

في غربتي، عارضت أنا ركب الأغراب
أشد.. وأنزل .. والليالي ركايب
أضداد .. وأقران وعدوان .. وأصحاب
متناقضات الخلق .. ماغاب غايب
أسهر معـا تهويـم نجمـات الأحبـاب
حتى يصيـر النجـم بالصبـح غايب
أصبح على فجرٍ ضحوكٍ ..وعجاب
وأمسي على همسات، ستر العجايب
وقامت تجاذبني على درب..الأسباب
نفس الشباب..يحدها عقل اشايب
مشيت في رمضا..وسنّدت بهضاب
وعارضني سيول ،وهبّت هبايب
وأمسيت في صحرا.. وقيّلت فـي غاب
ومن طاول الغربـات،شـاف العجايب
مرتنـي الدمعـه، بهـا الوجد مـاذاب
في غربة الأشواق، راحت هبايب
مرتني البسمـه، تقل فوقهـا حجاب
وراك خجلي يـارسول الحبايب
والحب.. مريتـه غريـبٍ علـى بـاب
عقب القصور..أمست قصوره خرايب!!
بغيت أسلي خاطـره.. عقب ماشـاب
لقـيـت مـالـه بالتسلي طلايب
أقفى مـع المقفيـن.. وجـلٍ ومرتـاب
على عقـوق الوقـت، بالحيل عايب
في غربتي.. مريـت رجلي وركـاب
أرزاق.. من رب الخلايق، وهتايـب

قلبي اللي

قلبي اللي لواه مْـن الصواديـف لاوي
جرّحتـه الليالـي و الحظـوظ الرديّـه
و الله أنّي بوسط الناس كنّـي خـلاوي
من يلوم المفارق عقـب فرقـا خويّـه
أشهد ان المفارق من عظيـم البـلاوي
مير هـذا نصيبـك يالعيـون الشقيّـه
أتجلّد و أقول أنّي علـى البعـد قـاوي
و الله أعلم بقلبٍ فيـه الأشـواق حيّـه
كيف راحت يابو تركي حياتي شقـاوي
وين درب السعـاده و الحيـاة الهنيّـه
ليت لأهل الهوى و الحب قاضي دعاوي
كان أداعي عيون اللـي فراقـه خطيّـه
كنّي المبلـي اللـي قطّعتـه المكـاوي
كلّمـا جـظّ بالـونّـات زادوه كـيّـه

*************************************

كل ما نسنس

كلما نسنس من الغربي هبوب
حمل النسمة سلام
وان لمحت سهيل في عرض الجنوب
عانق رموز الغرام
لك حبيب ما نسا
كلمته دايم عسى
اطلب الله وارتجيه
صبح يومي والمسا
كل زين اشاهده وانتم بعيد
منوتي ليتك معي
وان سهرت الليل اهوجس بك واعيد
هل لاجلك مدمعي
وانت هاجس خاطري
وانت فرحة ناظري
يا قريب ويا بعيد
فيك امس وحاضري
نشوتك تلعب مع قطر المطر
وانتشى قطره معك
والسحاب يطاردك بين الشجر
خالق الزين ابدعك
الندى في وجنتك
صار عطر بلمستك
والهوى غنى طرب
تستثيره بسمتك
كلما ضمت عيوني منك طيف
يا بعد كل الطيوف
قلت ما مثلك على الدنيا وصيف
لا حشا مالك وصوف
لا سحاب ولا مطر
لا نسيم ولا زهر
لا طيور ولا زهر
ولا مع باقي البشر

لو نسيت

لو نسيت العمر ما انسى دمعتك
صرخة ذابت من عيونك دموع
ترتعش مرتاعة في وجنتك
وانتفض قلبي لها بين الضلوع
أزعجت صمت الليالي عبرتك
بالخفا ثوره وبالظاهر خشوع
تسكب الدمعه وتظمى نظرتك
مشهد النظرة وهي تظمى يروع
يا ضياع العمر ضيعة بسمتك
ضاع معها خافق مثلك جزوع
ليت من يمتص جارح لحظتك
والفرح يشعل دياجيرك شموع

***********************************

مجموعة انسان

قالت من انت ؟ وقلت مجموعة انسان
من كل ضد و ضد تلقين فيني
فيني نهار وليل وافراح و احزان
اضحك ودمعي حاير وسط عيني
وفيني بدابة وقت و نها ية ازمان
اشتاق باكر واعطي امسي حنيني
واسقي قلوب الناس عشقٍ وظميان
واهدي حيارى الدرب واحتار ويني
واحاوم صقور الهوا حوم نشوان
واسيل الوديان دمع حزينِ
في عيني اليمنى من الورد بستان
وفي عيني اليسرا عجاج السنينِ
تهزمني النجلا وانا ند فرسان
واخفي طعوني والمحبه تبين
ِاما عرفتيني فلا ني بزعلان
حتى انا تراني احترت فيني

مدوّر الهيّن

يامدور الهيّن تـرى الكايد أحلـى
و أسأل مغنّـي كيادات الطروقـي
الزين غالـي لكـن الأزيـن أغلـى
و الكلّ شـرّاي ٍ بضاعـة وسوقـي
النوّ عالي و السمـا فوقـه أعلـى
و لا فاق علم ٍ جـاه علـم ٍ يفوقـي
الصعب هلاّ قلت يا صعـب سهـلا
دامك تبيني فأنت يا صعـب شوقـي
أحب اعسف المهـرة اللـي تغلّـى
و أحب أروّض كل طـرف ٍ يموقـي
و أحب أسافر مـع سحـاب ٍ تعلّـى
و أحب فوق الغيـم لمـع البروقـي
و أحب أساهر بدري اللـي تجلّـى
و ارسم شعاع الشمس عند الشروقي
يا من علـى ثايـر فـؤادي تولّـى
خلّك على قلـب الكرامـه شفوقـي
أكـرم عزيـز ٍ بالعمـر مسـتـذلاّ
يسوق عمـره للمشاريـف سوقـي
اخترتك مـن النـاس للقلـب خـلاّ
يا حيثك مرادي و كيفـي و ذوقـي
ما رحـت أدوّر كـل زول ٍ تحلّّـى
لولاك تسوى ما عطيتـك خفوقـي

************************************

يا صقر

ياصقر واهنيك لك جنـاح تطيـر
لى طرى لك نزعت وطرت يم الهوا
بين قلبي وبينك فـرق والله كبيـر
لى كفخت انطلقت ولى كفخت التوى
انت حايم وانا بالقاع دوبـي اسيـر
في صحاري زماني ذيب ليلي عوى
فوق جوك سحاب وحدر جوي هجير
القدم فوق رمضا والخفـوق التـوى
الحذر يا صقر لا يشبكونـك اسيـر
ويل صقرٍ يتله مربطه لـى نـوى
برقعته اللّيالي فوق وكـرٍ قصيـر
عقب صفقه جناحه بالهوا لى اهتوى
كل حرٍ الى ضاق انتهض للمطيـر
حومتـه بالسمـا ساعـة لقلبـه دوا
واعذاب الجناح اللّي يجـره كسيـر
كّلما فزّ مكسور النواهـض هـوى

يالله دخيلك

ستّل جناحه ثمّ حام يرقـى علـى متـن الهـوى
يزفّه بعيـد ٍ و أنـا محـدود فـي حـدّ النظـر
له بالهوى شف و مرام يلعب مـع الغيمـة سـوا
و لا جناح ٍ لي و أطير و الأرض صارت لي مقر
فكري تغشّاه العسام أمسيت و فكري مـا ضـوى
الأرض كفر ٍ من الونس و الليل من فرحي قفـر
طيري ضرب جوّ الهيام ولو دعيتـه مـا ألتـوى
عزّي لمن طيره غدا ولا لـه مـن أمـره مفـر
شبّيت ضوّي في الظلام في صحصحٍ ذيبه عـوى
مالي أنيس إلا النجـوم أو نـور وضّـاح القمـر
خالي وكنّي في زحـام قلبـي تلهـب و أنشـوى
ما عاد أميّـز بالحشـا ولا علـى ضـوّ الجمـر
وين أنت يا داعي سلام وين أنـت يـا بايـع دوا
ردّوا لي النومـه تـرى فالعيـن جـلاّد السهـر
دوّرت في الشدّه حـزام ولا لقيـت اللـي قـوى
يالله دخيلك مـا لقيـت اللـي نشـد بـه الظهـر

******************************************

ياطارد

يا طارد اللي راح خله وملوه
ما يستقيم الظل لا عوج عوده
ولا ينفع الندمان قولة حولاه
جحر لدغ يمناك لا لا تعوده
مد النظر في خلق ربي تمعناه
إلى انتقص من حال حال يزوده
الله جعل للمبتلي داه ودواه
وكل على عزمات قلبه حدوده

يسلمووووووووووووووووووووووو
يعطيك العافيه

» ديوان الشاعر الامير بدر بن عبدالمحسن
» ديوان الشاعر خالد المريخي
» ديوان الشاعر الامير عبدالرحمن بن مساعد
» ديوان الشاعر حامد زيد
» ديوان الشاعر سعد علوش ,